عارف يعني ايه مراتك؟؟
كتبت /عزه السيد
عارف يعني ايه مراتك؟
يعني مش عيب انك تمسك إيدها وانتو ماشيين في الشارع
ولا عيب إنك تعلن حبك لها قدام “اهلك” و “اهلها”
مش عيب إنك تناديها باحب الأسماء ليها……و
ولا عيب إن في غيابك ترن وتطمن عليها
وبرضو مش عيب إنك تساعدها في شغل البيت ···
مش عيب إنك تفسحها لوحدها وبس وتحسسها إنها سبيشيال
ولا عيب إنك تجبلها حاجه بتحبها علشان تعرفها إنك لسه فاكر بتحب إيه
عارف إيه هو العيب؟؟
العيب إنك تحسسها انك غريب وانت ماشي جنبها في الشارع علشان الناس تقول عليك “سي السيد” وتمشي بينك وبينها متر علي الأقل
العيب إنك متمدحهاش قدام أهلك وتحسسها إنها غريبه عنكم
العيب إنك تناديها باسم مش حباه أو تفضل تناديها باسم إبنها لحد ما تقرب تنسي إسمها وتنسي ان الرسول أمرنا ننادي الشخص باحب الأسماء اليه
● العيب إنك تكون في الشغل طول النهار وسايبها في البيت بلا ونيس ولا جليس ومتفكرش تطمن عليها
العيب إنك تفضل تقول قدام الناس “دي المدام” “دي ام العيال ” ومش راضي تنطق اسمها وكانه عار ونسيت الرسول وهو بيعلن حبه لعائشه وسط الجميع
(لو هي بتحب تناديها باسم إبنها كده انت في السليم )
العيب برضو انك تكون قاعد قدام التليفزيون وهي رايحه جايه قدامك بالغسيل والكنيس وعماله تكح علشان تحس بها وانت ولا هنا ونسيت ان الرسول كان يعمل في مهنه أهل بيته
العيب ان يوم اجازتك تروح مع صحابك وتنساها بدل ما تفسحها وتفرحها وكأنك نسيت ان الرسول كان بيتسابق مع السيده عائشه وكان بيفرح زوجاته !
العيب إنك تفضل تنقط لها مصاريف الشهر وتكون بخيل معاها وتنسي تجيب لها هديه من حين إلي حين !
هي سابت بيت كانت تعيش فيه أميره علشان تروح بيت تكون فيه ملكه مش مكينه تولد وتربي وتغسل وتمسح !
جاءت اليك لتكون نصفك الثاني يعني هي ” روحك”
بسم الله الرحمن الرحيم
وَمِنْ آيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لَآيَاتٍ لِقَوْمٍ يَتَفَكَّرُونَ
يا معشر الرجال إستوصوا بالنساء خيراً ورفقا بالقوارير
