عريس يامااااى

بقلم / أمل الوكيل

التربية الحديثة دلوقتى للبنت اصطياد عريس من غير اى دراسة ولا هبل المهم المنظر العام حتى لو هتطلق بعد شهور.

فبمناسبة انتشار حالات انفصال الأزواج وفسخ الخطوبات بشكل هيستيري ، على الجميع ان يعلم أن

.. جزء كبير من احتمالية نجاح أي علاقة ارتباط عاطفي بتيجي من تقبل النقصان

.. قبول حقيقة إنك مش هتقابل الشريك المثالي اللي هيحققلك اللي في خيالك ١٠٠٪

.. عشان مش موجود .. مفيش الشريك اللي هيعملك كل اللي أنت عاوزه بالظبط على مزاجك

.. العالم مفيهوش مثاليات .. ومستحيل تفصل شخص على مزاجك إلا لو هتستعبده وتشكله بالحرف وهو مجبر على هواك

، وبردو هتيجي لحظة ويرجع لحقيقته .. جزء كبير من نضجك في تفهمك إن من واجبك التعايش مع عيوب الطرف التاني ، زي ما أنت كمان فيك عيوب

، ده مش تفضل منك ، طول ما عيوبه في نطاق العيوب مش الأذى الصريح الواضح ،

ونجاحكم سوا في الحفاظ على خط التفاهم ده ، خط التضحية المتبادلة اللي يوم ما هتبقى من طرف واحد هيبقى أول يوم في بداية النهاية ، واللي بيحاول يقنعك تضحي أنت بس ده بيستغلك مش أكتر ..

كل واحد فينا عنده مشاكله ، عقده ، مميزاته وعيوبه ، أحلامه وتصوراته ، اللي بيحبه واللي بيكرهه ، كل ده بنحاول نلاقيله مساحة مشتركة بينا ، على أرضية من المحبة ، والمودة ، والتراحم المتبادل ، والحنية

.. والحنية بينكم يوم ما هتغيب ، والله ما هتلاقيلها بديل يحل غيابها

العلاقات الصحية بتتبني بالتضحيات ، اللي وإحنا بنعملها مبنحسش إنها تضحيات

، وبنعملها برضا ، وإحنا عارفين إن مجهودنا هيتصان ..

وعلى رأي أمي قالتلي: في كل مرة أنا كنت بتنازل وبعدي لأبوكى وقت غضبه عشان متأكدة إنه يقبل يمشيلي بلاد عشان بس يرضيني