فلسطيني من ساسي لراسي
مكتوب ومحفور على جبيني
فلسطينى ..
ومطبوعة ف قلبي
القدس نابلس رام الله غزه الخليل بيت لحم
وغصن الزيتون مزروع في قلبي وف طيني
فلسطيني ….
قضيتي أرضي
قضيتي عرضي
ومستعد أشوف الويل وضلام الليل
لاجل أحرر أرضي
لاجل أبني بعدي يكون مرضي
بلدي اللي ضحكتها أجمل نهار
بلدي بلد العمار
مرسومة ف عيني وعينيك يابو عمار
والحجر التقيل اللي أتحط وكبس على نفسي
هو اللي بيتفتفت وبردوا على العدو
حجر سجيل يكوي قلبه مايكويني
فلسطيني ..
أرضي وهفضل ف أرضي
ياموت شهيد .. ياعيش سعيد
وأبني بلدي من جديد
بحجر مغموس من دم عدويني
فلسطيني ..
قرب يوم الإنتصار
والغايب يلاقي الف دار
والليل حيطلعلو نهار
حيفضل كلامك ف قلوبنا يابو عمار
ياجبل مايهزك ريح . ياجبل مايهزك ريح
ياوتد يابطل
يم البطل شهيد وجريح
أجلت أفراحي ودوست على جراحي
ويوم العيد يوم النصر
واليوم مش طالب حد يعزيني
فلسطيني …
ياكل عربي القدس قدسك
ليل ونهار تناديني
بتقولك ماتنسي محمد الدرة
بتقولك أقفوا صف واحد ياعرب مرة
طلعوا العدو من أرضنا بره
يارب أنصرني وقويني
يارب نصرة من عندك
يارب لنور الحق أهديني
يارب أبويا وأخويا راحوا قدام عيني
فلسطينى ..
يارب أجعلها نصرة قوية من عندك
يارب وحدك أنصرني أحميني ….
يارب وحدك أنصرني أحميني ….
شعر/ محمود النزاوي
كاتب وشاعر