فوقوا يا ناس دى المودة بتقرب وتقوي العلاقات

بقلم : عزه السيد

مهما كانت أنواع العلاقات وأشكالها ومهما كانت بدايتها في النهاية بنلاقيها عبارة عن طرفين سواء كانو اتنين صحاب … سواء واحد وحبيبته أو واحد ومراته ولا اتنين مخطوبين … كلها عبارة عن طرفين بينهم شيْ …. والمفروض انه شيء طيب يسعدنا مش يؤذينا ….

للأسف مع الوقت وضغوط الحياة والمسؤوليات باختلاف أشكالها ودرجاتها بنلاقي إن أغلب العلاقات بتتأثر بشكل كبير ويبتدي يدخل العناد والكبرياء وممكن الزهق ومشاكل تانية كتير أوي تضرنا نفسيا ونبتدي نستغرب ونسأل هو ليه كدا ….

المشكلة فينا كلنا بدون إستثناء لأن كل واحد فينا بقي بيتحفز وياخد وضع الإستعداد للحرب ويتقمص دور المضطهد …. كل واحد بقي يقول إشمعني أنا اللي اسأل وليه انا إللي أعمل وليه انا إللي أقرب.
الست تقول: ما هو الراجل والكلام المفروض يطلع منه والراجل يقول :هي الست المفروض الدلع منها والمفروض تستناني وتعملي
وهى تقول :وهو وراه ايه علشان ميتصلش بيا …. بنرمي اللوم علي الطرف التاني وبس .. ولو جيت إتكلمت مع واحد فيهم هيقولك مانا ياما عملت وياما سويت وكانت النتيجه ايه …!!

اللي بيقول ياما عملت وياما سويت ده غلطان وبيدي سبب لنفسه علشان يكابر ويعند اكتر وطالما العند دخل في العلاقة يبقى هيدمرها
والبيه اللي بيتكسف يعمل حاجة عشان الجلالة وخداه ويقولك كبرياء … من إمتي سيادتك !! وكان فين المبدأ ده في أول العلاقة ….

بس عارفين … ده كله علشان إحنا اتعمينا عن الحل إللي موجود قدامنا كلنا … ونسينا إن أهم مفتاح في أي علاقة هي …
المودة …..
أيوة المودة هي الحل لكل مشاكلنا مع بعض …
الحب مهما كان هو مشاعر جوانا ومحدش يعرف صدقها ولا قوتها غير صاحبها …
لكن المودة هي الواقع الملموس ….
..لما نتصل علشان نسأل ونطمن علي بعض بغض النظر مين سأل ومين اطمن .. ما يمكن الثاني في حاجة مضيقاه معكننة عليه عيشته ومش معني إنه منزل بوست مثلا على الفيسبوك يبقي فاضي .. بالعكس ممكن من خنقته ….
.. لما نضحك في وش بعض الضحكة دى او البسمة بتدوب جدار القسوة جواناا

لحضن البسيط بين الراجل ومراته ليه بقينا بنبخل بيه ……

كلمة صباح الخير بابتسامه ….
الكلمه الحلوة لخطيبتك …
وردة واحدة حتي ..
بلاش نركز علي هفوات بعض والغلطات الصغيرة كلنا بنغلط وكلنا عايشين في نفس الدوامة ..
إفتحوا مواضيع جديدة ومتركزوش علي المشكلة أوي وحاولوا تعدوها دى الحياة قصيرة أوي وبتعدي بسرعة وخلوا هدفكم هو إنكم تبقوا جنب بعض
فوقوا يا ناس دى المودة بتقرب وتقوي العلاقات ما بينا …. ومن غيرها غصب عنا التراب هيتكوم فوق قلوبنا لحد ما تتحول لحجارة ونفقد الإحساس
طول ما حنا بنستني الطرف التاني هنفشل .. زي مانت مستني هو كمان مستني وانتو الاتنين هتملوا من الإنتظار وهيموت اللي بينكم .. والوقت بيعدي وطول الفراق بيقسي …
كفاية ظلم لنفسنا قبل ظلمنا للناس اللي معانا … كفايا ظن سيء بدون ما ندي فرصة نسمع

كفايا نألف الفلم بدماغنا ونخرجه ونصدقه … !!

كفاية بخل مشاعر … كلمة بود مش هتكلفك كتير بس هتكسب من وراها أكتر …

ان اظلم الناس لنفسه من رغب في مودة من لا يراعي حقه