في المشمش.

بقلم/خالد طلب عجلان

في المشمش ووعدني كتير في المشمش وسمعت كلامة…

في المشمش سمعنا حكاوي ومواويل …وأدينا بنستنى المشمش..

العيشة مش عايزه كلام هتبقى جنة واحلام وأحلامك وأحلامي حقيقة هتتحقق بس في المشمش…

في المشمش ..ياما طرح المشمش بطيخ ..والفل طرح العناب..لا تعلق ولاتدقق ده كلام لا عليه لوم ولا عتاب…في المشمش..

وسمعت كلامه المعسول..ووعوده وعهوده ..خلاني زي المهبول…هركب طيارة وعربية ..في المشمش..

وهجيب شقة وشالية وكراسي وترابيزة وشمسية…في المشمش..

هسافر لبنان شهرين وهزور أمريكا سياحة ويمكن أفوت ع البحرين….في المشمش..

في المشمش الحاوي وقرده سرقونا والقرد الجاني بيصرخ ….أغيثونا…في المشمش

في المشمش ..ومسكت الديب من ديلة… وطلع الديب من غير ديل ..والقط بيجري من الفار والكذب بقى له رجلين…في المشمش..

ولا عمري هتوب ولا هتعلم وهسلم دقني من تاني

ولا عمري هبوح ولا هتكلم وكفايا نسمع في أغاني

وفي الغنا أستاذه وحريفة والطبل الكل يطبل

ماهو مولد…والمولد مليان مديحة

المشمش ياولاد الإيه ..ضاع عمري بستنى المشمش والمشمش فات من شهرين ..وبرضوا مستني المشمش..