عندك حالة من اليأس … رزقك ضيق , صحتك تعبانة , ولادك مش متفوقين في دراستهم , عندك هموم كتير , وصلت لحد اليأس , فتحت لليأس الباب , ووقفت تبكي بدون ما تفكر انت ايه وصلك لكده , ولا مين عمل فيك كده , واشمعنا انت اللي عندك كل اليأس ده جواك .
اخترت تكمل في طريق مظلم , مش معروف نهايته ويمكن مش معروفه كانت إيه هي بدايته . طيب عارف النتيجة اللي هتوصلها ايه ؟ مش هتوصل إلا لرزق اضيق لإنك هتنشغل باليأس عن السعي . مرض أكتر لإن اليأس نفسه مرض ملوش علاج للأسف . ولادك هيتأخروا أكتر في حياتهم لإنك القدوة والقدوة غرقانه في اليأس مش هيعيشوا حياة كلها أمل وقدوتهم في اليأس ده . همومك مش هتنتهي .. هتزيد وفكر وجرب هتلاقيها زادت.
ولسة لو مقرر تستمر . فتحت لليأس الباب وفاكره حياة , مش هتوصل لحاجة زي ما انت شايف . طيب جرب تقفله وامشي في طريق النور والأمل لحد نصه متكملوش مجرد تجربة .. هتلاقي طريق فيه مفتوحلك عشان تسعي علي رزقك فهيزيد .. هتلاقي نفسك مبطل تفكير ومؤمن بانك لك علاج ونص العلاج اقتناعك بيه فصحتك هتتحسن .. حتي لو ما اتحسنتش هتلاقي نفسك مقتنع ان ده ابتلاء من ربنا والمؤمن بس هو اللي مبتلي فهترضي , وهتلاقي قلبك مفتوح للدنيا .. ولادك هيسمعوك بتحمد ربنا وراضي هيحمدوه وهيتعلموا الرضا منك انت ( ما احنا متفقين انك القدوة وهما توابع زي العجينة اللي بتتتشكل ) .
قبل نص الطريق هتلاقي نفسك بتسأل هو أنا كنت ليه كده , كنت شايل الهموم دي كلها لوحدي ليه , مرميتهاش علي ربنا ليه .. هتلاقي نفسك قادر تكمل ومكمل .. هتلاقي النور بيشدك , وبيبانه بتتفتح . هتلاقي قلبك بيرضي بالقليل , فربنا يكافأك بالكتير .. ناس كتير بحث عن عمل وموصلوش , بس رضاهم وسع رزقهم .. كلمة يارب لوحدها بتفتح مليون باب .. اقفل بيبان اليأس في وش اليأس .. وافتح طاقة نور واحدة في حياتك هتكفيك .. مش هتموت
