كسرة نفس
كتبت: أمل الوكيل.
عُمرك سالت نفسك الشخص اللى بتتعامل معاه اياً كان نوع العلاقة عصبى اوى ليه كدة..او عدوانى وديماً حاسس بعدم ثقة تجاه الناس..بيتنرفز بسرعة وبيغضب وبيثور..عارف الشخص اللى وصل للمرحلة دى.. اهو دا كان اهدى خلق الله ..كان بيسمع ويناقش ويصدّق ويهزر الناس دى كنت بتشوف صدى مشاعرهم فى علاقتهم بالناس من كتر لين قلبهم ورقتهم ..مسألتش نفسك او فكرت ليه اتحول لشخص انطوائى كدة..وبقى قافل على نفسه,الناس اتعرضت لصدمة كبيرة فى حياتهم او خُذلان كسر فيهم روحهم..او فقدان اثر فى حياتهم وطفى لمعة عنيهم..الخذلان شعور أوحش من انهُ يتوصف يا جماعة ..ياااه… لما تيجى لحظة واقرب حد ليك تهون عليه انتَ..
يااااه لمّا تكون حبيت واّمنت واستجدعت ووثقت فى شخص وييجى يخذلك..ياااه لما اكتر واحد انت تفضل جنبهُ وتعمل كل حاجة تفرحهُ.. وفجاة يكون هو ده الشخص الوحيد اللى يعيطك ويبكيك ويبهدلك بالشكل ده؟ انت مُش بتتكسر وبس.. لاء.. انت بتصعب عليك نفسك..وربنا يكفيك شر كسرة النفس..بتحس انك قُليل اوى .. وبيستهين بيك وبيقلل منك..فرد فعل طبيعى انك تكون عدوانى فى رد فعلك كدة..خلاص بقى مفيش حاجة عندك تتحمل..قلبك نشف من الصدمة..والزعل بان عليك..والحزن بقى مُلازم نبره صوتك ومحاوطك..
– الناس اللى اذتك فى حياتك ومشاعرك بمثابة الكابوس.. لازم تتخلص منه..وتهدم كُل شئ بيفكرك بيهم..جى الوقت اللى تنضف فيه دايرة معارفك وتغلىّ نفسك وتعففها..وتسقط الناس الوحِشة من حياتك وترميهم وانت بكامل ارادتك ..وتبدُا بعلاقات حيه تشبعك..تعوضك عن اللى فات.. ومتقلقش والله ربنا بيعوض بيعوض وبيكرم وكرمهُ كتير..بس نقطة ومن اول الناس وكمّل.
