كلام ستات وشوية تكات..الكراكيب

كتبت / عزه السيد

الكراكيب من اهم اسباب أن البيت علطول مش مرتب وفي حاجة غلط ف المكان ..

الكراكيب بتدي طاقة سلبيه جدا ف المكان لان منظرها غير مريح للعين ومتعب للاعصاب للناس ال مزاجها مرتبط بالمكان ال قاعده فيه ..

وعشان كدا هنتعلم نتخلص من الكراكيب

التخلص من الكراكيب هيكون بشكل دوري منتظم .

هنشتري اي حاجة علي اد استخدامنا بس .

هنحدد مكان مخصص لكل حاجة ف البيت عشان يسهل علينا وعلي باقي افراد البيت انه ياخدها من غير م يبهدل الباقي.

هنتخلص من اي حاجة قديمة قصاد اي حاجة جديدة بنشتريها ..

لما اشتري شوز جديد هنفرز الشوزات واتخلص من الغير مستخدم .

اشتريت ملابس اطلع القديم والضيق والواسع وكل ال بطلت استخدامه .

اشتريت برطمانات صلصة ومربي وغيره ارمي البرطمانات الزيادة ال شيلاها من سنه لحين استخدامها بدون فايدة .

بحتفظ بالاكياس ال هستخدمها بس وارمي الباقي .

علب الكريمات والشامبوهات وچراكن صابون المواعين وغيره بتترمي مش للتخزين خالص

ترتيب وتنظيم الدواليب ..

بنرتب دولاب المطبخ ونرتب التوابل مع بعض والبقوليات مع بعض والنشويات مع بعض وهكذا عشان يكون سهل الاستخدام واكون منظمة وانا بشتغل .

دولاب الملابس بنرتبه حسب الاستخدام وتصنيف الالوان والقطع .. بطبق التيشرتات مع بعض والبنطلونات فوق بعض ولبس البيت مع بعض وهكذا بحيث اثناء السحب مبهدلش باقي الدولاب.

ترتيب الأسطح ..

رخامة المطبخ تكون فاضية او فيها حاجات بسيطة بستخدمها يومياً.

التسريحة يكون عليها ديكور بسيط وروتيني اليومي ف بوكس صغير والباقي في الادراج .

اي ارفف او ترابيزات مش مكان للكراكيب خالص .. كل حاجة ليها مكان بتتحط فيه زي م قولت فوق

اللعب بنرمي اي لعبة مكسورة ومقطوعة وملهاش استخدام .

بلاش اڤورة في الديكورات ،، خليكي ف البساطة

نستخدم منظمات للادراج .

الورق بقاا يتفرز اول ب اول .. ويكون عندك ضلفة فيها كام فايل كدا مقسماهم كل فايل خاص بورق معين .. والباقي بيترمي .

التخلص من الكراكيب مستحيل يكون مره واحدة خصوصاً ان في ترابط عاطفي معاها

كل يوم نمسك اوضة او دولاب او درج المهم نكسر حاجز الاحتفاظ بالكراكيب .

بيت بدون كراكيب = بيت واسع منظم +طاقة ايجابية =ست بيت سعيدة