كلام ستات وشوية تكات
كتبت / عزه السيد
الفانيليا :
يا سلام عليها لو ضيفناها على اي حاجة بتخليها خيال على العصاير خصوصا لو اي حاجة فيها لبن
بلح جوافة موز أي عصير
هتحسي طعمه زي اللي بتشربيه في أحلى الكافيهات
حطيها كمان على عجينة البيتزا طعمها بتكون ولا بيتزا هت
أما بسيح السمن بضيفله ورق لاورا وحبهان
بيديله ريحة حلوة أووووي ويتخزن لمدة سنة بنفس الريحة
صلصة الكشري أما بعملها وتخلص بعملها طشة توومة بكزبرة كتيير بتفرق في طعم الكشري كله
اما تشتري اللبن وتحسي أو تشكي انه ممكن يكون رايب او هيروب وهو بيغلي اول ماتحطيه عالنار ضيفيله معلقة بيكنج بودر كبيرة وقلبيها فيه
ان شاء الله مش هيروب خالص
حفظ الخضروات الورقية زي الشبت والبقدونس والجرجير
إغسليهم ونشفيهم في فوطة نظيفة بس مش يكون فيه نقطة مية واحدة ولفيها في ورق أبيض نظيف مش كيس علشان الكيس بيعمل بخار مية وينزل عالخضار يسوده ويبوظه
لو عندي بواقي كيك بفتته واعمله تورتة جيلي
بعمل في قالب جيلي واما يجمد بفتت عليه نص الكيك وبعدها طبقة كريم شانتي وبعد كده باقي فتافيت الكيك واصب باقي الجيلي واسيبه يبرد في التلاجة تاني
الملوخية انا بضيفلها كزبرة خضرا وتتخرط معاها بتكون لذيذة أوي
اما تخزني خضار أو فاكهة في الفريزر ما تنسيش تخرجي الهوا اللي في الكيس علشان الحاجة اللي جوا ما تسودش وتفضل محتفظة بلونها
لو عاوزة تعملي أكلة شكلها شيك وموفرة في نفس الوقت ممكن تعملي الشيش طاووق وتضيفى مع الفراخ بطاطس مكعبات بتزودها وطعمها يجنن وشكلها جمييل
وإنتى بتعملى المحشى بعد ما تحطى الرز عا الصلصة والخضره وخلاص هتحشى بصلايه حلوه كدا مبشوره وطمطمايه كبيره حلوه برضو ومبشوره وقلبيهم ع الرز وشوفى فرق الطعم
اما بعمل شوربة لسان عصفور بحمرها واسيبها شوية علشان لو ضيفت عليها الشوربة على طول لسان العصفور بشقق كأنه مكسر
