كلام ستات وشوية تكات
كتبت/ عزه السيد
كلام مفيد جدا
عشان مطبخك يبقي دايما نظيف لازم يبقي عندك شوية اسلحه دايما جاهزين
لازم اجيب كيس كلوركس الوان واحطو نصفه فى بخاخه ومعاهم مايه
وده بقي بلمع بيه الرخام والبوتجاز والحوض
تخلصى الاكل تجرى تنقلى الحلل من على البوتجاز ورشة واتنين من المحلول ده وادعكى ولمعى بوتجازك وهو لسه سخن عشان الدهون ما تمسكش وبتلمع البوتجاز وترجع تحط الحله تانى وتكمل تسويه تانى
خلصتى واتغديتى متخليش معلقه وسخه فى الحوض بعد الاكل فى ثوانى هتكونى مشطبه مواعينك وانتى معلقه على كوباية الشاى
خلصنا وشطبنا نلم فوط المطبخ ويجى دور السلاح التانى كيلو برسيل جيل سايب بردو بخمسه جنيه هنحطو فى ازايز وبضيف عليه قشر الليمون و معندكيش حطى نص كيس الكلور الالوان معاه وننقع بقي فوط المطبخ لغاية بليل ونغسلها قبل ما نام ونسبها تنشف
عشان مطبخك يفضل نظيف ومرتب على طول
هقولك مثال خالصتى المواعين وهترصيها اعدلى ترتيب الكوبايات وانتى بترصى الكوبيات النظيفه
هتفتحى درفة الحلل رتبي حللك قبل ما تدخلى الحلل النظيفه
علبة السكر خلصت اغسليها ونشفيها قبل ما ترجعى تمليها
علبة التوابل فاضية هنغسلها ونشفها كويس ونطحن التوابل وننزل فيها
طول ما ايدك فى المطبخ هيفضل زى الفل
كل اول شهر لما بجيب خزين الشهر
بنضف كل برطمان قبل ما اضيف فيه الحاجات الجديده
ورقه وقلم دايما فى مطبخك واكتبي وصفات الاكل اللى ناويه تعمليها
اذاعه القران فى المطبخ اوعى تقفليها هتتعلمى منها حاجات جميله وهتسمعى فى العصريه فتاوى وفقه هتفيدك
وبليل هتسمعى تواشيح وتلاوات قران ربنا ينفعك بيها
عايزه تخلصى شغل بيتك بسرعه شغلى سورة البقره وقولى هخلص شغلى فى نفس توقيت السوره ورددى وقولى معاها هتحفظيها.
