كلام ستات وشوية تكات
![](/wp-content/uploads/2024/07/inbound6106084863029942912.jpg)
كتبت/ عزه السيد
كلام جميل ومفيد
تعرفي ايه سر ان اكل امهاتنا وجداتنا كان طعمه مميز وجميل السر في النار الهادية
لما بتسوى الاكل على نار عالية بيفقد كتير من قيمته الغذائية ده اولا ثانيا بقي لما بيستوى بسرعة بيفقد العصارة اللى فيه وبالتالى بيفقد كنير من طعمه
سوى الاكل على نار هادية هيبقي طعم ولذيذ جداً وده بجد
لما تفرمى التوم علشان تخزنيه ماتحطيهوش فى علبة حطيه فى كيس من اكياس الثلاجة وافرديه كويس واطبقي الكيس وبضهر السكينة قسميه مربعات على اد الاستخدام وجمديه
لما تيجى تستخدميه مش هتحتاجى تفكيه كل اللى عليكى تقطعى المربع بس
وممكن تعملى كدة مع الملوخية كمان هتبقي اسهل كتيييير
تعرفى ان السكر لو فركتيه فى ايدك بعد ماتأكلى سمك او تقشري توم بيضع الريحة من ايدك تماما
معلقة صغيرة سكرة عليها نقطتين سائل مواعين وافركى ايدك واغسليها وشمي ايدك وادعيلى
فى فنجان صغير حطى معلقة كربوناتو وعليها عصير ليمون هيفور خدى الرغوة على فرشة الاسنان وادعكى اسنانك بيها ودى وقت اللزوم مش دايما ولو لستك حساسة بلاش علشان غلط وشوفى فرق البياض سنانك هتنور
وعن تجربة من اول مرة
لتنظيف المراوح او المرايات او الشفاط
فى بخاخة اخلطى كربوناتو وخلو ورشية وامسي بفوطة واتفرجى على اللمعان
لو دهون الشفاط رشي كربوناتو الاول وسبيه خمسة وبعدين رشى الخلطة بتاعتك وسيبيه خمسة واغسليه بالليفة وشوفى النضافة
لو عندك قميص بتاع جوزك مغلبك فى المكواة
بخيه ووطبقيه مبروم وحطيه فى الفريز نص ساعة وطلعيه اكوية ولا اسهل
استخدمى الشرابات النايلون القديمة فى تلميع الزجاج والمرايات هتشوفى احلى نضافة ولمعان للمرايات
لو عايزة تتخلصي من ريحة الاحذية
حطى فى الحذاء بودرة تلك او كربوناتو او بيكنج بودر بيمتص الروايح
لما تيجي تعملى اى معجنات حطى السوايل كلها الاول وبعد كدة ضيفى الدقيق شوية شويةلغاية ماتظبطى العجينة
لان الدقيق ساعات بيختلف من نوع لنوع نوع بيشرب المية كتير ونوع تاني لاء
لو فى الوصفة خميرة وملح ماتحطيهومش مع بعض حطى الخميرة مع السكر فى الاول وبعدين لما تضيفى الدقيق ضيفى الملح علشان مايأثرش على نشاط الخميرة