كلام ستات وشوية تكات

كتبت / عزه السيد

تكات واسرار الطهى للمحاشي

كيلو الباذنجان بياخد ربع كيلو رز

نص كيلو ممبار نص كيلو رز

نص كيلو ورق عنب بياخد كيلو رز

٣ كيلو باذنجان ونص فلفل بياخدو كيلو رز عشان ميبقاش مليان

المحشي لو مليان رز جامد مش هيستوي

أسرار المحشي

١_مقدار الشوربه لمحشي الكرنب تكون الشوربه مغطيه كل طبقات المحشي ماعدا الطبقه الاخيره بس

٢_مقدار الشوربه لمحشي البدنجان تكون الشوربه واصله لتلتين البتنجانه بس وهى واقفه فى الحله

٣_مقدار الشوربه لمحشي الفلفل او الكوسه تكون الشوربه واصله لنص الكوسه بس.

٤_محشي ورق العنب لو خايفه يفك منك بتحط عليه طبق عشان الرز ميخرجش منه

٥_تسويه المحاشي عامة احنا بنسوي الرز مش الخضار

يعني لو محشى باذنجان بتاخدي واحده تفتحها لو الرز استوا يبقا تمام تطفي النار متستنيش جلد الباذنجان نفسه يستوي لأن الرز هيكون عجن منك وده في حاله لو الباذنجان مش طازه ومركون بقاله كام يوم

٦_المحشي بنسيبه علي نار عاليه وبعد كدا بنهدي النار تسويته زي الرز بالظبط مع مراعاه ان المحشي بياخد وقت أطول حسب كل نوع

٧_خضره المحشي بتكون شبت وكسبره وبقدونس

٨_توابل المحشي ملح فلفل كمون شطه

٩_بنضيف معلقه صلصه عشان بتعزز اللون ومعلقه صغيره من السكر عشان الحموضه

١٠_تخديعه المحشي ببصل

بحب اوي بعد ما الصلصة تتسبك انزل بالرز واشوحه فيها لمده خمس دقائق على نار عاليه وبعدين أطفئ واضيف الخلطه دي ببشر بصلايه وادعكها بملح وفلفل واضيفها

١١-وانزل على الرز والخلطه بمعلقتين كبار زبده فلاحى وشمى الريحه إلى بتجيب اخر الشارع