كلام ستات وشوية تكات

كتبت / عزه السيد

كلام جميل ومفيد جدا

لنضافة بيتك اعملى كده

1- كيس كلوركس الوان تحطيه فى بخاخه ومعاهم مايه وشوية خل ابيض

وده بقي بنلمع بيه الرخام والبوتاجاز والحوض و ممكن نلمع بيه العيال من كتر حلاوته

تخلصى الأكل تجرى تنقلى الحلل من على البوتجاز ورشي رشة أو اتنين من المحلول ده وادعكى ولمعى بوتجازك وهو لسه سخن عشان الدهون ما تمسكش بس اوعى تتلسعى وتدعى عليه بس الستات الشاطره فهمانى وبتلمع البوتجاز وترجع تحط الحله تانى وتكمل تسويه تانى

️خلصتى واتغديتى ما تخليش معلقه فى الحوض بعد الاكل فى ثوانى هتكونى مشطبة مواعينك وانتى بتحضري كوباية الشاى اللذيذة

خلصنا وشطبنا وده مستحيل عشان بيجوعو كل خمس دقايق

️نلم فوط المطبخ ويجى دور السلاح التانى كيلو برسيل جيل سايب هنحطو فى ازايز وبضيف عليه قشر ليمون

و لو مش عندم حطى نص كيس الكلور الالوان معاه وننقع بقي فوط المطبخ لغاية بليل ونغسلها قبل ما نام ونسبها تنشف

عشان مطبخك يفضل نظيف ومرتب على طول

هقولك مثال لو خلصتي المواعين وهترصيها لازم تعدلي ترتيب الكوبايات وانتى بترصى الكوبيات النظيفه

هتفتحى درفة الحلل رتبي حللك قبل ما تدخلى الحلل النظيفه

علبة السكر خلصت اغسليها ونشفيها قبل ما ترجعى تمليها

علبة التوابل فاضية هنغسلها ونشفها كويس ونطحن التوابل وننزل فيها

طول ما ايدك فى المطبخ هيفضل زى الفل

كل اول شهر لما بجيب خزين الشهر

بنضف كل برطمان قبل ما اضيف فيه الحاجات الجديده

اذاعه القران فى المطبخ اوعى تقفليها هتتعلمى منها حاجات جميله وهتسمعى فى العصريه فتاوى وفقه هتفيدك

وبليل هتسمعى تواشيح وتلاوات قرآن ربنا ينفعك بيها

عايزه تخلصى شغل بيتك بسرعه شغلى سورة البقره وقولى هخلص شغلى فى نفس توقيت السوره ورددى وقولى معاها هتحفظيها بإذن الله