كتبت / عزه السيد
نصايح وتركات اول مره هقولكم عليها هتخليكى اشطر شيف
لو عاوزه الفراخ تتحمر صح غطيها وخلي النار متوسطه طول فترة التحمير هتبهرك النتيجه
الكاري بيحل محل مرقة الدجاج وكذلك بهارات الفراخ
لو الطماطم بتاعتك مش حمرا بتسخني الزيت وتنزلي فيه بمعلقه صغيره بابريكا لمده دقيقه مع التقليب وبعدين انزلي بالطماطم واتفرجي ع اللون بقا وممكن معلقه صلصه بدل البابريكا
لو ريحة قلي السمك بتضايقك ضيفي في الزيت نص ليمونه هتمنع اي ريحه وممكن كمان رشة فانيليا متستغربيش بس جربي هتدعيلي
لو عاوزه المخبوزات تبقا طريه غطيها بفوطه مبلوله اول ما تخرج من الفرن او رشيها ببخاخ ميه وغطيها بسرعه
لو عاوزه صلصة المكرونه بتاعتك تنافس المطاعم اعمليها ببصل بس تشوحيه لحد ما يدبل بس ما يلونش معاكي وضيفي معلقه صغيره سكر وزيها زعتر ريحان بيبقا خطير اوي
لو عاوزه المكرونه البشاميل تبقا جوسي يبقا تعملي البشاميل خفيف جدا من البدايه يبقا قوامه شبه الكيك الخفيف
البشاميل علي البارد بيبقا تحفه ومقداره خمس معالق دقيق للتر اللبن ومعلقه واحده زبده
المكرونه واحنا بنسلقها مش بنحط زيت في هوا ملح بس
البوريك بياخد اللون الحلو بتاعه من معلقه كبيره صلصه بنضيفها علي العجينه
الزبادي اساسي في تتبيلات الفراخ عشان بيطريها وبيخليها تستوي كويس
لما المحشي يستوي وتحمري الفراخ خودي مغلقتين من السمنه بتاعة تحمير الفراخ وحطيها عليه ودوقي بقا
الوش بتاع الرز المعمر بييجي من القشطه البلدي ولو مش موجوده استخدمي زبادي ولازم النار تكون عاليه في البدايه
لو البتنجان بيشرب زيت بنقطعه شرايح بالطول ونحطه في مصفاه عليه رشه ملح بينزل كل الميه اللي فيه ونعفره دقيق ويتقلي مبيشربش زيت