كلام ستات وشوية تكات
كتبت عزه السيد
كلام ستات وشوية تكات
عشان مطبخك يبقي دايما نظيف لازم يبقي عندك شوية ادوات دايما نكون جاهزين بيها
1️ كيس كلوركس ألوان تحطيه فى بخاخه ومعاهم ميه وشوية خل ابيض
وده بقي بنلمع بيه الرخام والبوتاجاز والحوض و ممكن نلمع بيه العيال من كتر حلاوته
تخلصى الأكل تجرى تنقلى الحلل من على البوتجاز ورشي رشة أو اتنين من المحلول ده وادعكى ولمعى بوتجازك وهو لسه سخن عشان الدهون ما تمسكش بس اوعى تتلسعى وتدعى علية بس الستات الشاطره فهمانى وبتلمع البوتجاز وترجع تحط الحله تانى وتكمل تسويه تانى
واوعى ثم اوعى وانتى بتطبخى ترمى اى حاجة استعملتيها ف الحوض اشطفيها بسرعة ورجعيها مكانها (شفشق خلاط مصفى طبق غسيل الخضار والرز) كلة يرجع مكانة
️خلصتى واتغديتى ما تخليش معلقه فى الحوض بعد الاكل فى ثوانى هتكونى مشطبة مواعينك وانتى بتحضري كوباية الشاى اللذيذة
خلصنا وشطبنا وده مستحيل عشان بيجوعوااا كل خمس دقايق
️نلم فوط المطبخ ويجى دور السلاح التانى كيلو مسحوق جيل سايب هنحطو فى ازايز وبضيف عليه قشر ليمون
و لو مش عندك حطى نص كيس الكلور الالوان معاه وننقع بقي فوط المطبخ لغاية بليل ونغسلها قبل ما نام ونسبها تنشف
عشان مطبخك يفضل نظيف ومرتب على طول
هقولك مثال لو خلصتي المواعين وهترصيها لازم تعدلي ترتيب الكوبايات وانتى بترصى الكوبيات النظيفه
هتفتحى درفة الحلل رتبي حللك قبل ما تدخلى الحلل النظيفه
علبة السكر خلصت اغسليها ونشفيها قبل ما ترجعى تمليها
علبة التوابل فاضية هنغسلها ونشفها كويس ونطحن التوابل وننزل فيها
طول ما ايدك فى المطبخ هيفضل زى الفل
كل اول شهر لما بجيب خزين الشهر
️بنضف كل برطمان قبل ما نضيف فيه الحاجات الجديده
اذاعه القرآن فى المطبخ اوعى تقفليها هتتعلمى منها حاجات جميله وهتسمعى فى العصريه فتاوى وفقه هتفيدك
وبليل هتسمعى تواشيح وتلاوات قرآن ربنا ينفعناوينفعك بيها
عايزه تخلصى شغل بيتك بسرعه شغلى سورة البقره وقولى هخلص شغلى فى نفس توقيت السوره ورددى وقولى معاها هتحفظيها بإذن الله واخيرا وليس آخرا خليكى دايما على وضوء علشان لو الفرض ازف عليكى واذن تجرى بسرعة تصلية والشيطان مايلعبش ف دماغك.
