كلام ستات وشوية تكات

كتبت / عزه السيد

كلام ستات مفيد جدا اسمعيه

1- لو زاد منك فينو متخليهوش بره التلاجه أحفظيه فى الفريزر وابقي طلعيه وحطيه فى صنيه وروشي عليه مايه من البخاخه ودخليه الفرن هيرجع طازه تاني

2- العيش البلدي علشان يقعد مده أطول وميعفنش هويه لمدة نص ساعه على الترابيزه وتحتيه ورق او قماشه لحد متلاقيه نشف معاكي شويه وبعدين غلفيه فى أكياس وشليه فى التلاجه هيقعد مده طويله من غير ما يبوظ

3- عايزه تعملي هريسه الشطه زي الجاهزه بالظبط؟

أسلقي الفلفل الاحمرعلى بخار مايه وأضربيه فى الكبه وضيفي عليه زيت وخل ومعلقة سكر صغيره

ومتنسيش قبل متقطعي الفلفل أدهني أيدك بشوية زيت علشان أيدك متتحرقش من الفلفل

ولو نسيتي أغسلي أيدك بقطعة ليمون وبعدين بالصابون.

4- علشان كفتة الرز متفكش منك ضيفي عليها شوية شعريه هتتماسك وتعزز الطعم

5- بعد متعملي طاجن الباميه باللحمه هاتي فصين توم وقرن فلفل وشوية كزبره ناشفه وحمريهم فى حتة لية خروف أومعلقتين سمنه وطشي الطاجن وروشي عالوش شوية كزبرة خضراء هتاكلي وتدعيلي

6- السبانخ علشان متسودش منك ويفضل لونها أحمر وجميل أسلقيها فى مصفى على البخار وسبيها تتصفى وبعدين ضفيها على التسبيكه غلوتين بس وأطفى وطشيها بالتوم والكزبره وقرن فلفل بردو

7- خلي عندك برطمان عسل اسود فى المطبخ ضيفي عليه ليمون ومعلقه كل يوم على الريق هيعالج كل المشاكل اللي بتعاني منها زي الهالات تحت العين الكحه الانيميا هيديكي نضاره لبشرتك لو أستمريتي عليه

هيديكي حيويه ونشاط

8- اللبان الدكر ده كوم تاني

هاتي كيس من العطار ب عشره جنيه اول متصحي على الريق خودي فص وشوفي ريحة فمك عامله ازاي

وهيعالج كمان ألتهابات المعده والانتفاخات ويفتح نِفسك ع الأكل

وفى وسط النهار هتاكلي فص بردو وبالليل قبل متنامي وانتي هتلاحظي الفرق.