كلام ستات وشوية تكات.
كتبت / عزه السيد
لو عندك مكواه بخار وحاسة ان كفائتها قلت حطى في خزان الماية خل وسخنيها وسبيها ربع ساعة في الفيشة على اعلى درجة وبعدين اضغطى على دافع البخار لحد ما يتبخر كل الخل حتلاقي طلع حاجات كدة زى الطين ودى رواسب الماء لما بيغلي ويتبخر وكررى الطريقة مع مايه عادية مرتين لشطف خزان الماء وفوطة مبلولة امسحى الرواسب اللي خرجت حتلاقيها رجعت جديدة
– عاوزة عيون البوتجاز الاستانلس تبرق انقعيها مع قشر ليمون ومايه سخنة في طبق وبعدين بصابونة وش اي نوع لوكس او كامى او اى حاجة حطى منها حته على ليفه واغسليها حترجع جديدة
– لبسي الباسكت اللي في الغرف اكتر من كيس فوق بعض بحيث يتملي واحد تشليه تلاقي واحد مكانه وبكدة توفري وقتك في تغيير الكيس كل يوم
– دايما خلى عندك فرشة بإيد وهاتى علبة شاور جل او شامبو فاضيه وحطى فيها سائل تنظيف و كلوركس وانتى بتغسلي وشك الصبح حطى شوية سائل واغسلي الحوض في اقل من دقيقة بقى زى الفل
– اول ماتصحى الصبح وقبل ما تخرجي من اوضتك اعدلي ملاية السرير والمخدات وبكدة تكونى خلصتى من مهمة يومية من غير ماتخدي بالك
– وانتى واقفه تعملى الشاى ولا النسكافيه على ما الماية تغلي روقى درفة واحدة في المطبخ تكون عاوزة تتظبط هتلاقي دايما مطبخ نضيف ومتروق .
