كلام ستات وشوية تكات.
كتبت / عزه السيد
زودى على المعجنات زبادي او لبن بودره او رايب هيخليها هشه زى السحاب
– لو عايزه تبشري اى نوع جبنه ادهني المبشره شويه زيت هيسهل ليكي البشر بطريقه سريعه جدا ودي سهلت عليا البشر عموما اتمني تجربوها
عشان تسرعي سوا اللحمه زودي نواه بللحة مش هتأثر على الطعم نهائي وهتخلي اللحمه تستوي بسرعة وتكون دايبه دوووب جربتها ولحد دلوقتي معرفش نواه البلح ازاي بيعمل كدة
– الرز يتشوح الاول فى زيت ورشه ملح وفى نص السوا شيلي الغطا وختي الزبده او السمنه بالمعلقه على وش الرز خطيرة الحركة دي وهتلاقي ريحه ونتيجه روووعه فى الطعم
– رشه سكر على اى تسبيكه طماطم بتعادل حموضه الطماطم وتخليها خفيفه على القلب وبتسكرها وتبقي زي العسل
– المعجنات لازم تدخل فرن سخن ومجرد ماترفع وتتنفخ يبقي قلبها استوا وتابعيها عشان متتحرقش لو خدت لون من تحت وفوق لسه بتفتحي الشوايه
– لسهوله تحمير الشعريه ولسان العصفور للتفريز للناس البتشتغل او وقتهم ضيق اقليهم فى زيت سخن وغزير وطلعيهم بالمصفاه ويتحفظوا في علب او اكياس تلاجة بعد مايبردوا
لو المخبوزات الناشفة او الكوكيز او البسكوت اخد رطوبة وبقي طري سخني الفرن عشر دقايق واقفليه ودخليهم لمدة ربع ساعه الفرن وهو سخن ومطفي كدة هتتخلصي من الرطوبه وهيرجع ينشف تاني ويطلع مقرمش
