كلام ستات وشوية تكات

كتبت / عزه السيد

اكتر من حاجه بعملها لتنظيف البيت بتسهل على المهمه وبتخلى البيت فعلا نضيف ومستعد لآى زائر فى أى وقت

كلنا علب البخاخ عندنا اول ماتفرغ بنرميها ، انا بعيد استعمالها تانى لانها فعلا مفيده

اول حاجه غسيل وتنظيف علبه البخاخ من الماده الاصليه التى كانت بها

ونبدأ الاستعمالات.

بسم الله

لتعطير البيت

ماء ورد نخلطه بالماء ومعلقه كبيره اى زيت معطر عندنا…..انتى كده عندك معطر رخييييص جدا وفى نفس الوقت رائحته دائمه بالبيت……بعد ما نفتح الشبابيك الصبح للتهويه وبعد دخول الشمس وتلميع الاثاث واعاده اغلاق النوافذ كلها هنرش الستائر والسجاد والكنب واى فرش بالبيت واستمتعى بالرائحه والنظافه

لتنظيف الحمامات والمطابخ

مقدار من الكلوركس ومنظف الصحون و2ملعقه خل ابيض عادى كبيره، ونضعهم بالرشاشن ونضع بكل حمام زجاجه

بعد كل استعمال للتواليت او الحوض نرش منه ونشطف بسهوله ، الحمام هيفضل نضيف وبيبرق ورائحته فى منتهى النظافه بالاضافه للتعقيم كمان

ونفس الخلطه عند حوض المطبخ بعد الجلى يتم رش الحوض بها من جميع الجوانب لازاله الدهون والجير من على الحوض

ونرش بها البوتاجاز لتنظيفه كل يوم وفور وقوع اى شىء عليه وممكن رشه على الشفاط الاستانلس لازاله الدهون المترسبه عليه كل يوم مجرد مسحه بالاسفنجه والدنيا هتبقى منتهى النظافه.

وممكن رشه فى اى اوانى فار عليها الاكل او اللبن من الخارج لتسهيل تنظيفها.

قشور الفواكه

الفتره دى التفاح والبرتقال بكثره ومتوفر

بعد تقسير التفاح ما ترمى القشر حطيه فى اى انيه قديمه وعليه ماء وعود قرفه ورشه فانيلا صغيره جدا واتركيه على نار هادئه جدا وتمتعى برائحه الجو المعطر بالقرفه والتفاح

وممكن قشر البرتقال كذلك نفس الطريقه

او وضعه بأى طبق فوق الثلاجه حتى يجف ، وفى الفتره حتى يتم جفافه هيملاء المكان او الغرفه اللى انتى حاطاه فيها بعطر البرتقال وبعد الجفاف التام يطحن لاستعماله فى عمل الكيكات برائحه البرتقال

وبكده تكونى استفدتى منه مرتين

لتسهيل التلميع للموبيليا

كلنا عندنا شرابات قطن (رياضيه ) بتبوظ او تقدم ماترميهاش ، بدل ماتنظفى بفوطه تلميع البسى الشراب ورشى عليه بليدج او حطى عليه شويه زيت زيتون ولمعى الموبيليا الخشب ، تحكمك هيكون اسرع واسهل واتقان التنظيف هيكون افضل