كتبت / عزه السيد
لنجاح الكيك النار لازم تكون مش عاليه يعنى 180 مش اكتر وحطى معلقه خل متخفيش مش بيبان فى الطعم خالص بيخلى الكيك هش وفاتحه وبيشيل ريحه البيض
وبرضو للمعجنات حطى معلقه خل بيخليه ريحته حلوه اوى وطرى مش بينشف .
لو هتشوى فراخ فى الفرن علشان يبقى لونها احمر وطريه امسحى الفرخه بزيت قبلها بشويه
لما تقلى السمك وعايزاه من غير ريحه اول لما تحطى الزيت رشى فيه رشه فانيليا صغيره متخفيش مش بتعمل طعم وانسى الريحه خالص
سر الملوخيه علشان تروح الماطه الى بتبقى فيها حطى على الملوخيه مكعب ثلج
للمعجنات حطى علبه زبادى صغيره مع العجن
وانتى بتحمرى فراخ او لحمه علشان الزيت او السمن ميطرقعش رشى رشه ملح فبل ماتحمرى الفراخ او اللحمه وبتخليها مقرمشه
سر من اسرار الكبسه قبل ماتستوى بعشر دقايق اعصرى برتقاله وارجعى غطيها تكمل سوى وانقعى الزبيب فى عصير البرتقال
سر الكيك العااااااالى بس تخلصى خلط الكيك حطى اقل من ربع ملعقه صغيره كربونات الصوديوم على نص غطى خل بس تفور وقلبيها على الكيك
سر البشاميل الكريمى ضيفى عليه علبه قشطه او ربع كوب كريمه طهى او جبنه سايحه بطعم القشطه
لاعطاء لون فاتح للحمه وهى بتتسلق بس حطى معلقه سكر صغيره هى كمان بتسوى بسرعه
سر البيتزا زى المطاعم 3 حاجات اولهم حطى لبن بودر بالعجين ورشه سميد على الصينيه فبل وضع العجين ورشه على الصلصه والجبنه بعد لما تستوى البيتزا اخرجها واحط الجبن
سر السلطه الخضره بتاعت الحاتى قطعى البصل شرايح ورشى عليه ملح وشطه وخل وربع كوب مايه وسبيه فى التلاجه شويه