كتبت / عزه السيد
التنضيف اليومي هيكون اوضه اوضه بمعني تخلي لكل اوضه ربع ساعه فقط وان شاء الله لو مشيتى علي الجدول ده هيكون بيتك علي طول نضيف ومش هياخد معاكى وقت التنضيف
غرفه النوم
رتبي السرير لمي الكراكيب مع ان مفروض اوضه النوم مافيهاش كراكيب
لمى الهدوم لمعي الخشب ولمعي الزجاج
نضفي التسريحه اكنسي الارض وامسحي بمعطر اوديتول او كلوركس الوان تحفه الكيس ب2 جنيه بريحه الورد تحفه
عطري الاوضه وغيري الكيس الي في البسكت ماهو لازم كل اوضه فيها باسكت واقفلي الباب
اوضه الاولاد
رتبى السراير لمى اللعب والكراكيب بتاعتهم في باسكت ولو اولادك كبار لازم تعوديهم علي لم حاجتهم لوحدهم
الهدوم اللي مش نضيفة علي الغسالة والنضيف علي الدولاب
لمعي كل الخشب الي في الاوضة اكنسي الارض وامسحي الظاهر من السيراميك
غيري كيس الباسكت وافتحي الأوضه تتهوي وانتى بتشتغلي ساعه واقفلي علشات التراب
عطري الأوضه واقفلي الباب
الانتريه والصالون
زي بعض ممكن الانتريه لو هيا أوضه المعيشة زي عندي مجهودها اكتر
رتبى الكراسي ونفضيها امسحي الخشب
لمي الكراكيب نظمى المكتب ومكتب الكمبيوتر
اكنسي الارض وامسحي الظاهر من الارض
عطري وغيري الكيس بتاع الباسكت اقفلي الباب بتاع الأوضه لو بيتقفل انا الانتريه في اوضه والصالون في الصاله
المطبخ
روقي الرخام لمي المواعين في الحوض
اغسلي الرخامه اغسلي البوتجاز اكنسي الارض
اقفي اغسلي المواعين والأرض نضيفه علشان لو وقعت مايه علي الارض تكون الارض مكنوسه ميلزقش التراب
امسحي الاشانى الي حوالين الحوض واغسلي الحنفية
امسحى الأرض لمى الزباله في كيس ونضفي بسكت الزباله اوعي تسبيه يوم من غير غسيل
الحمام
نضفي المرايات نضفي حوض الوش
امسحي الاشاني اغسلي البانيو. ان وجد
اغسلي التواليت اغسلي الخلاطات كلها
ادعكى الارض امسحي وجري المياه علي البلاعه ونشفي الارض خالص خدي شور
وبالطريقة دى البيت هياخد معاكي ساعه ونص ساعتين بالكتير
ادوات التنضيف معطر فريدا للسجاد والستاير بحط منه مقدار وازود مياه ديتول سايب كلوركس الوان وكيس كومفرت ب10ج حطي منه مقدار في البخاخه وزودي الباقي مياه وخليه في ايدك ترشي بيه ع الفرش والعفش
