كلام ستات وشوية تكات
كتبت / عزه السيد
شويه نصائح مفيده للتوفير
-الرز تعيري بالكوب كوب واحد مع نص كيس شعريه يضمن لك وجبه لأربع افراد والباقي تحتفظي به مغسول منقي في علبه بعد تجفيفه في التلاجه لسهوله عمله..
-المكرونه الشعريه بلاش سايبه هاتي اكياس للأسف السايب بيسوس والاشوله عرضه للفئران… خلي حاجتك مكيسه اضمن بكتير من السايب مع توفير في الاستخدام.
-التوابل هاتي انت واعملي الجاهزه بقت نار غاليه قوي وطبعا البائع بيبقي محتفظ بها في برطمانات هاتي فلفل اسود زعتر حبهان مطحون شمر وينسون كمون وكسبره بابريكا وكاري وتوم وبصل بودر وكركم واخلطيهم كل حاجه هاتي باتنين جنيه ما عدا التوم بودر هاتي بخمسة واخلطي وتبلي الفراخ…. السمك نفس الخلطه بس زودي كمون اللحمه نفسها بس زودي توابل لحمه بتتباع عند العطار زودي معلقه.
-السكر لما تيجي تحطيه في برطمان علي الحوض لو نزل فتتات افتحي الميه بدل ما يدخل في الادراج ويجيب نمل وتعايري بمعلقه جافه حتي لا يتكتل.
-المكرونه كل ما تنزلي هاتي كيسين تلاته وشيلي يوم معندكيش اكل شويه مكرونه مع بطاطس الف هنا.
-اللحمه المفرومة بتحب البصل لكل كيلو نص بصل مع ربع فلفل اخضر وربع طماطم ولو فيه مشروم زيتون الف هنا وكيسي الكيلو علي اربع صواني اي ان كانت.
-الفراخ البانيه الشاورما بزود الكيلو فلفل الوان وبصلتين جوانح بعد ما احمرها ومشروم واكيس الكيس، علي التسخين مع اضافه طحينه ووضعها في ارغفه مدهونة كاتشب.
-السمك تبليه كله واحتفظي به للوضع في الفرن اسهل واجمل في الطعم.
– اعملي صنيتين مكرونه وررقاق وحطيهم في الفريزر للطواريء جالك ضيف، او تعبتي لا قدر الله.
-البشاميل اعملي بالكمية واحتفظي به في الفريزر وعند استخدامه زودي شوربه.
-الطماطم رخيصه اخر نداء حتوصل لعشره نهايه الشهر هاتي واعملي صلصه بوضعها كماهي مقطعه علي النار وخفض الحراره حتي تتفتت، فاضربيها في الخلاط وكيسيها.
