كيف تحافظى على حب زوجك لكى….

كتبت ياسمين يحيي

من أجل حياه سعيده ومن أجل المحافظه على جوزك ونفسك كمان
خليكى دايما واثقة انك جميلة.انثى مميزة.وقادرة تبقى احلى واحدة وجسمك وهيئتك ليكى انتى قبل اى حد تانى .

إتعودى كل فترة تروحى كوافير لأبسط الحاجات ع الاقل ميبقاش متجوز اخوه جمال فى البيت

مش كل اهمال فى نفسنا هنحدفه على جملة الحلاوة حلاوة الروح..لا انتى كمان حلوة الملامح دايما ريحتك تبقى حلوة ماتخليهوش يخمن طبخة ايه ع الغدا اول مايقابلك فى وشه من ريحة اللبس وخلى بالك الشعر اكتر حاجة بتمتص ريحة الزيوت والاكل مش بس مجرد تغيير الهدوم

جربى تلبسى فستاين قصيرة زى بتاعة الاجانب سواء بتاعة النهار او سهرة وجربى لبس الكعب
بلاش لبس الجلاليب فى البيت عمال على بطال…ولا البنطلون تحت الهدوم ولا يجى من بره
اعملي وصفات طبيعية لهفهفة شعر

اهتمى بالباديكير لرجلك وايدك على فكرة الصوباع الصغنن المدوحس هو واخد باله منه متفتكريش انه متدارى يعنى

بلاش الكحكة بسكر اللى ع طول عملاها فى شعرك فى البيت سيبيى شعرك وحتى لو شعرك بيهيش
اعملي دايما في بيتك حمام الزيت للشعر

_مايبقاش لبسك طول اليوم واحد من الصبح لبليل بنفس الجلابية معاكى فى المطبخ معاكى فى شاور العيال معاكى ع الغدا وتغيريها بقى قبل النوم ..ايوة هنجدد اهو ياسلام ..نلاقى نفس سحنتها بس لون بصلى اصل البصلى اشيك بليل

_متناميش وشعرك مربوط بمنديل اجدادنا كل مايتقلب يعينى يلاقى عم عبده بتاع البيبس نايم جنبه ابقى لفيه لما يروح الشغل..

_لما تصحى الصبح اعملى اسنانك و خدى نعناع عشان متبوظيش اى لحظة رومانسية كانت بتشاور عقلها تحصل..واهريه هو كمان نعناع والعيال نعناع وجارتك نعناع انعشى المواطنين ماهى زاطت بقى

_ماحبكتش التنضيف وهو فى البيت وخيالك انه هيرفع رجله ويهزر معاكى زى اغنية اليسا اجمل احساس فى الكون…لأن الواقع هتغنى ياشبشب الهنا اشمعنا بس انا.