كيف تعيش مرتاح ؟
لو عايز تعيش مرتاح أقرأ الكلام ده كويس و لو ما عجبكش مش هتخسر حاجه ..
في الدنيا دي مفيش حاجه اسمها حب افلاطوني ، او عشق ، او مقدرش اعيش من غيرهم او استغني عنهم !!
بس فيه حاجه اسمها تعود ، انجذاب ، احساس ، ارتياح ، اعجاب ، احتياج ، غريزة
مش مهم انت بتحب مين ؟ الاهم مين اللي بيحبك و بيقدر وجودك في حياته ، و عاوز يحافظ عليك و خايف يخسرك !!
اوعي تكون كتاب مفتوح للأخرين ، الوضوح الزائد ده شئ ممل و بياخد منك ، صدقني بعض الغموض مطلوب أحيانا !!
اوعي تفتكر ان كل ما بتضحي و تيجي علي حساب نفسك عشان تسعد الاخرين دي حاجه كويسه ، بالعكس فاقد الشئ لا يعطيه من حقك علي نفسك انت كمان انك تعيش مرتاح و سعيد !!
الطيبة الزائدة دي مش ميزه علي فكره ، بالعكس دي ممكن تكون عيب خطير فيك ، لانها احيانا بتخليك تتنازل و الناس بدال ما بتقدر طيبتك تلاقيها بتستغلك و تقول عليك ده باين عليه ده عبيط ده و لا ايه !!
اوعي تكون بسيط مع الناس لدرجة انك تفقد هيبتك و يبطلوا يعملوا لك حساب !!
كتر الاندماج وسط الناس ما بيجبش غير المشاكل صدقني ، اجعل دايما مسافه امان مع كل الناس حتي لو كانوا اقرب ناس ليك !!
ثق في الاخرين بس في نفسك اولا ،،، بس بلاش تصدق كل حاجه بتتقال لك عشان مش كل الناس صريحة و صادقة زي ما انت فاهم !!
اوعي تاخد بنصيحة حد و انت مش مقتنع بيها تماما و تعمل بيها في الاخر ، فيه ناس ممكن توديك في ٦٠ داهية و تقعد تتفرج عليه و تقولك طب و انت سمعت كلامي ليه !!
ما تحكيش كل حاجه بتحصل في حياتك كنوع من الفضفضة و الرغي ، في حاجات لازم تفضل جواك انت و بس و حتي انت المفروض تنساها !!
و خليك فاكر حاجه مهمة جدااا نحن ذكري في الدنيا و حقيقة في الأخره .. ياريت تبقي ذكري جميلة و حقيقة أجمل !!
