كلنا محتاجين حد يحس بينا ، حد يحس بكل ما فينا ، حد يقرا كل اللى جوانا بمجرد مايسمع نبرة صوتنا أو حتى يشوف نظرة عنينا
حد يحسسنا انه ماسك فينا ، وانه عمره ما هيبعد عنا لأننا جزء منه ،ويحسسنا اننا فعلآ دقه من دقات قلبه ، نفس من أنفاسه
حد بيقدر ظروفنا وبيعرف ازاى يمسح دمعة قلوبنا بنظراته الحانيه وكلماته الصادقه الدافئة ، محتاجين حد يحتوينا ، يتألم لوجعنا ويطير من فرحة بينا ، حد يكون كل همه إنه يشوف لمعة السعادة ماليه عيونا
حد يحسسنا إننا مهما نبعد هيدور علينا، ومش هيرتاح إلا لما يلاقينا لأن وجودنا فعلآ مهم جدا جدا عنده وان سعادته مش بتكمل إلا بوجودنا معاه
حد يحبنا بجد مش مجرد كلام بيتقال لأن الحب بجد لازم كلامه يتحس قبل ما يتقال
محتاجين حد يحسسنا بجمال الكون بريحة الندى وهو حاضن ورقة الشجر ، بريحة المطر وهو بيروى الأرض الظمئانة ،حد نشوف جمال الكون فى نظرة عنيه ، نلمس الأمل والأمان من لمسته ، نشوف معاه كل اللى بنتمناه بقلوبنا ومشاعرنا قبل عيونا
حد يقولنا فى كل الأوقات ..أنا هنا… أنا جنبك… أنا معاك.. أنا بيك.. أنا ليك…أنا انت.
لأننا بجد تعبنا من دوامة الحياة ، هلكتنا وكسرت كتييييير من أحلامنا وكتير أجبرتنا على الرضوخ لرغباتها واننا نعيش دور غير دورنا ونكون فى مكان غير مكانا ، وبتكون حياة واتفرضت علينا ، ومش بنقدر نعيش إللى كنا بنتمناه .
لما كنا صغيريين كنا بنشوف بكره أمل ،كنا بنتمنى تعدى الثوانى والدقايق والسعات والأيام والسنين علشان نشوف بكره، علشان نقول إحنا خلاص كبرنا دلوقتى لما كبرنا بقينا بنخاف من بكره ، بقينا بنقول يا ريتنا فضلنا صغيريين، علشان كده بجد محتاجين نحس ونتحس ، محتاجين نحب ونتحب ، محتاجين الناس اللى فى وجودهم بنحس بالأمان ،ومن قلوبهم بنذوق الحنان وفى نظرة عيونهم يهون مر الزمان، محتاجين نحس بالإهتمام ممكن يكون الإهتمام موجود بس مش حاسينه وطالما مش حاسينه هيكون دون جدوى .
