معلومة فى كبسولة .. بقلم : أمل الوكيل

من الحاجات الجميلة اللي حصلت اليومين اللي فاتوا والعالم كلها بيتكلم عنها الموقف اللي حصل بين نادي بوروسيا دورتموند الألماني ونادي موناكو الفرنسي؟

فريق بورسيا دورتمود كان رايح يلاعب فريق موناكو الفرنسي في دوري أبطال أوروبا والمبارة كان مقرر إقامتها في ملعب نادي بوروسيا دورتموند بألمانيا.

حصل انفجار استهدف أتوبيس اللاعيبة وأدى لإصابة لاعب ومدا فع نادي بورسيا دورتمود مارك بارترا واتنقل للمستشفى في ساعتها للعلاج والمبارة اتأجلت لليوم التاني.

المشكلة اللي وقعت فيها جماهير نادي موناكو اللي جايين مع فريقهم من فرنسا انهم كانوا حاجزين في الفنادق ليلة واحده بس اللي هي الليلة اللي قبل يوم الماتش علطول .

فلما حصلت الحادثة قامت جماهير دوزتموند طلعت بمبادرة ان أي مشجع فرنسي هيبات الليلة الزيادة اللي هيقضيها في دورتموند في استضافة مشجع ألماني في بيته.

وتم تفعيل  الحساب الرسمي لنادي دورتموند عمل هشاتاج وسماه #bedforawayfans وطلب من كل مشجعي نادي موناكو انهم يخشوا عالهاشتاج ده ويختاروا يباتوا مع مين.

وعدّت الليله العصيبة دي وجماهير نادي موناكو تاني يوم رفعوا لافتات التضامن مع لاعب نادي بوروسيا دورتموند المصاب مارك بارترا وشعارات النادي في المدرجات.

وبرغم ان فريق موناكو كسب 3 – 2 إلا ان الكل نسى فرحة الفوز والجميع كان بيتكم على موقف نادي بوروسيا دورتموند وجماهيره والروح الرياضية بتاعتهم .

الموقف ده خلاني افتكر خناقات الأندية المحلية بتاعتنا مع بعضها وخناقات الأندية العربيه مع بعضها وخناقة ماتش مصر والجزائر وخناقاتنا مع أندية المغرب العربي.

بيتهيأ لي احنا قدامنا كتير أوي لحد ما نوصل لروح الناس دي وتفكيرهم وتعاملهم مع بعض، وبيتهيأ لي بسبب المواقف الصغيره دي احنا  ليه بنحب كرة القدم.