كتبت أمل الوكيل
كلمتين كده بخصوص يوم عرفه..
– صيام اليوم ده بيكفّر ذنوب سنه فاتت وسنه جايه، يعني ١٤ ساعه صيام بس هتمحيلك ذنوب سنتين كاملين من حياتك، الرسول صلى الله عليه وسلم قال: “صيام يوم عرفه أحتسب على الله أنه يكفر السنة التي قبله والسنة التي بعده”، ١٤ ساعه قصاد الثواب الكبير ده قليلين جداً ياجماعة والله، ١٤ ساعه صيام قصاد ٧٢٠ يوم مغفره! انتوا متخيلين؟
– في حديث عن الرسول بيقول: “أفضل الدعاء دعاء يوم عرفة”، يعني الموضوع مش مغفره بس، انت ده أكتر يوم ممكن تدعي فيه لنفسك وأهلك والناس اللي بتحبهم، مخنوق او مدايق أو حاسس ان الدنيا جايه عليك عندك فرصه بكره انك تتوضى وتصلّي ركعتين كدا تدعي فيهم وانت ساجد بكل حاجه نفسك فيها وبإذن الله ربنا مش هيخيّب ظنك أبداً، حاش لله يعني.
– يوم عرفه أكتر يوم ربنا بيعتق فيه من النار، الرسول برضو قال: “ما من يوم أكثر من أن يعتقَ اللهُ فيه عبداً من النار من يومِ عرفة”، فكتّروا من الدعاء لنفسكم وأهلكم وكل اللي بتحبوهم بدعاء “اللهم اعتق رقابنا من النار”، ورتبوا امنياتكم ودعواتكم كلها، واسألوا ربنا إنه يتقبّل منكم، وادعوا بكل حاجه بتحبوها لعلّ دعواتكم تكون مستجابه.
– اللهم من ظلمني، أو سبني، أو شتمني، أو أخطأ في حقي، حياً كان أو ميتاً فاغفر له وارحمه، اللهم إني أشهدك أني قد سامحته، اللهم في يوم عرفه اجعلني ممن عفوت ورضيت عنهُم وغفرت لهُم وحرَّمتهُم على النار وكتبت لهُم الجنة، نحن ووالدينا ومن نحب أجمعين.