معلومة فى كبسولة.. تقدمها : أمل الوكيل

إلحقونا قنبلة فى التوك توك.،

قريت بوست لدكتور كشف على بنت من بنات الشوارع جابتها ست بنت حلال شافتها في الشارع وحبت تعمل فيها خير وتوديها تكشف عليها لان البنت شكلها تعبان جداً وحرارتها مرتفعه
الدكتور لقى جسمها كله كدمات وسحجات وعندها نزلة شعبية وأمراض جلدية بالعبيط وبلاوي تانيه كتير، وبعد ما الدكتور عملها كل التحاليل اللازمة اكتشف ان البنت حامل في 4 شهور وهي متعرفش
سألها مين أبو الجنين البنت معرفتش، وقالتله ان في كذا حد اعتدى عليها جنسياً وهي كانت بتقاوم زمان لحد مالقت انها بتضرب وبتتعور وبيتاخد منها اللي هما عايزينه في الاخر فبطلت
وطبعاً كل واحد بينجح يعمل معاها حاجه تاني مرة بيجيب زمايله وزمايله بيجيبوا زمايلهم المرة اللي بعدها وهكذا فالموضوع وصل ان في مئات اعتدوا عليها جنسياً وحملت من واحد فيهم
الدكتور صرفلها الأدوية اللي هتعالجلها الحاجات الظاهريه وقال للست انه هيتواصل معاها لما نتيجة باقي التحاليل تظهر ويكمل مع البنت العلاج وبالفعل النتيجة ظهرت والبنت طلع عندها الإيدز!
الدكتور كتب البوست وهو مش عارف يعمل ايه ولا يتصرف ازاي وفي احتمالية اصابة شباب كتير بالعبط بالإيدز في منطقة واحدة أو أكتر معظمهم سواقين تكاتك زي ما البنت حكتله
الدكتور مرضاش يدلي بإسم المريضة ولا مكان سكنها حفاظاً على خصوصية الحالة لكن عنده استعداد يديهم لأي حد أو شخص مسؤول يقدر يتصرف في وضع مرعب زي ده
المشكلة مش في الشباب اللي اغتصبوا البنت دي أو اعتدوا عليها جنسياً مراراً وتكراراً واللي أكيد معظمهم بقى حامل للفيروس ومصاب بيه بس لسه ميعرفش ان عنده الإيدز
المشكلة ان الشباب دول هيتجوزوا أو بالفعل متجوزين أو عملوا كده مع بنات تانية ونطاق المرض عمال ينتشر بينهم وستات كتير ممكن تكون متجوزة ناس من دول وملهمش ذنب فعلاً
ربنا ينتقم من كل واحد اعتدى على البنت دي وانا مبقتش عارفه والله احنا عايشين في غابة ولا ده غضب ربنا علينا ربنا يحفظنا ويرحمنا برحمته.