من القلب للقلب.. أهل الخير

كتبت / أمل الوكيل

من سوء أخلاق البعض أنه لما يلاقي خصلة جيدة في إنسان ، بدل ما يحاول يستمتع بيها و يقدر وجودها ، تلاقيه بيحولها لمادة خام للاستهلاك و الاستغلال ، يعني يقابل حد (مستمع جيد) يبدأ يقص عليه كل قصاصات حياته من ساعة ما اتولد المهم منها و الغير مهم و يستنزف طاقة استماعه من غير حتى ما يكلف خاطره و يسأله ( و أنت عامل ايه ؟! أنت كويس؟! ) …… يلاقي شخص متفائل و متماسك و بشوش ، يرهق نفسيته بالشكوى و التذمر و التأفف طول الوقت ، يلاقي شخص جدع ، يمشوره معاه في كل مكان و يستعين بوجوده حتى لو كانت الحاجة دي مش ضرورة و الشخص نفسه قادر أنه يعملها لوحده ، …. إلى آخره من النماذج السيئة في استغلال خصل الناس الحميدة ….

أهل الخير هم أحق الناس به ….

وجه طاقتك لأصحاب الصمت في الألم ، العزاز ، اللي بيقدروا وقتك و استماعك و مجهودك ، اللى يتكسفوا يتكلموا ليكونوا حمل أو عبء، اللي بيميزوا وجودك في حياتهم ، و بيحافظوا عليه ….

اللطافة و الأدب و حسن التعامل و البشاشة و الذوق لكل خلق الله ،

حضنك و دموعك و حرقة دمك و زعلك و همتك للغاليين ، للعزاز ، لأولاد الأصول ……