التعلّق بالنّاس .. شئ لعين

بقلم أمل الوكيل

إنّك تعلّق كيانك وسعادتك بإنسان.. ده موضوع كارثي، لأنّك بتفقد هويتك، بتفقد أساسك، بتبقى عبارة عن خيال مآته ملوش قيمة، عبارة عن ظل متنقّل سخيف..

هل وصلت لمرحلة الإدمان دي؟ هل وصلت لمرحلة الوحش:

((مش هقدر أعيش من غيره/ها))

الجملة دي مش جملة سهلة ولا عادية، لأنّك ربطت حياة كاملة بإنسان، رميت المستقبل كله ف إيده، سلّمتهُ مفاتيحك، أحلامك، أسرارك، دنيتك كلها، سلمته عمرك، سلمته فرحتك، في مقابل حاجة واحدة بس، حاجة واحدة.. بقائه جمبك!!

تخيّل.. حياة كاملة، مقابل إنه يفضل جمبك، لأنّك شايف نفسك معاه دونًا عن العالمين..

التعلّق ده مرض، إنك تجرب حاجات جديدة، وتروح أماكن جديدة، وتلاقي نفسك بتحن بمنتهى الأسى. فترفض أي بدايات، وترفض أي تغيير.. لأنك حطيت نفسك جوا إطار إستحالة تلاقي نفسك برا منه. حطيت نفسك مع نفس الشخص، وكل الذكريات الحلوة حواليكو، ذكريات ما هي إلا أدوات قتل بطىء