من القلب للقلب.. الشرع يحلل أربعة ولكن ..

بقلم : أمل الوكيل

سيدى الفاضل اللى شد انتباه حضرتك فى الشرع هذه جملة ” الشرع يحلل أربعة ” ولم تعلم..

 – انك غيرت فى الشرع يوم ما والدتك راحت لاهل خطيبتك تقول لهم وانتوا هتفرشوا ايه و تجهزوا بكام لان شرعا كل تكاليف الزواج عليك والمهر دة تدلع بيه نفسها مش تفرش بيه..

وغيرت فى الشرع يوم ما خليتها تحط كل مرتبها فى البيت لانها شرعا ملزمة منك هى والبيت والعيال…

– و غيرت فى الشرع يوم مارجعت من برة زعقت لها عشان الاكل مش جاهز والبيت مش متروق لان فى الشرع المفروض تجيب لها خادمه او تساعدها فى البيت هى مش خدامة فى الشرع..

– وغيرت فى الشرع يوم ماسبتها تنزل تدفع المصاريف وتقف عند الميكانيكى وتعمل المشاوير لان فى الشرع الرجال قوامون يعنى قايمين باعمالهم..

– غيرت في الشرع يوم ما مديت ايدك عليها و معملتش بالايه اللي بتقول و ( عاشروهن بالمعروف )

– غيرت في الشرع يوم ما مديت ايدك علي مرتبها و ميراثها و الست في الشرع ليها ذمه ماليه مستقله تماما عن الرجل

– غيرت في الشرع يوم ما طلقتها و مدتهاش حقوقها و حقوق ولادها و معملتش بالايه اللي بتقول

(  وَلِلْمُطَلَّقَاتِ مَتَاعٌ بِالْمَعْرُوفِ حَقًّا عَلَى الْمُتَّقِينَ ) …. و( أَسْكِنُوهُنَّ مِنْ حَيْثُ سَكَنْتُمْ مِنْ وُجْدِكُمْ وَلَا تُضَارُّوهُنَّ لِتُضَيِّقُوا عَلَيْهِنَّ ۚ وَإِنْ كُنَّ أُولَاتِ حَمْلٍ فَأَنْفِقُوا عَلَيْهِنَّ حَتَّىٰ يَضَعْنَ حَمْلَهُنَّ ۚ فَإِنْ أَرْضَعْنَ لَكُمْ فَآتُوهُنَّ أُجُورَهُنَّ ۖ وَأْتَمِرُوا بَيْنَكُمْ بِمَعْرُوفٍ).

الشرع مسبش حاجه غير لما اوجد فيها حل … طبقوا الشرع كله … كرموا المرأه و حطوا قوانين ملزمه زي الشرع ما بيقول … ووقتها الشرع كله هيطبق. وكله بالمعروف