من القلب للقلب .. الفرق العظيم
بقلم / أمل الوكيل
فيه ست بتشوف جوزها شاري قميص جديد فتبصله و تقوله مش بيتك أولى بفلوس القميص ده؟
و فيه ست بتنزل بنفسها تجيب القميص ده و تفاجىء جوزها بيه .
و الفرق بينهم عظيم !
فيه راجل بيشوف خطيبته متواضعة في طلباتها و بتقوله جيب اللي تجيبه يا حبيبي فيقرر يستغلها و يقلل منها و يجيب لها أقل حاجة .
و فيه راجل كل ما خطيبته تقوله مش عايزة يجيب لها أكتر ، كل ما تقلل طلباتها يعافر عشان يعملها أحسن حاجة .
و الفرق بينهم عظيم !
فيه ست لما جوزها يحكيلها غلطة عملها تتقمص و تصوت و تزعق و تنكد و تمرر عيشته و تندمه عاليوم اللي فكر يبقى صريح معاها فيه .
و فيه ست بتسمع إعترافه و تحيد مشاعرها و تبقى صديقة و أخت و ترجع تعاتب بعدين لما الجو يروق .
و الفرق بينهم عظيم !
فيه راجل لما يشوف مراته مشغولة في حاجة تخصها و لا عايزة تفصل ساعة من الدنيا يقرفها في عيشتها طلبات و زن و إنتي قاعدة فاضية وراكي إيه طول النهار ؟
و فيه راجل لما بيشوف مراته ناسية نفسها بيقولها إيه رأيك نخرج شوية نتفسح و تفصلي من البيت ؟
و الفرق بينهم عظيم !
فيه شريك حياة ضاغط عبارة عن بلوة متحركة ، تحس نومه عبادة ، خروجه بره البيت راحة نفسية ، إنشغاله عنك عيد.
و فيه شريك حياة وجوده مريح ، بيعرف يخليك مبتسم طول الوقت ، بيخليك متطمن ، الساعة بعيد عنه عذاب .
و الفرق بينهم عظيم… !
