من القلب للقلب.. تروس فى رحلة
بقلم /أمل الوكيل
زمان كنا بنسمع ونقرا كتير جملة “الكنز في الرحلة” .. وان المتعة الحقيقية في الأحداث والمواقف والظروف اللي بنمر بيها على طول الطريق .. لكن متعة الوصول للهدف وتحقيق الحلم دي مجرد متعة لحظية مش بتدوم كتير وبتختفي بعد شوية ..
كبرنا وبدأنا الرحلة .. واتبهدنا واتمرمطنا .. وعلامات الطريق بانت على وشنا .. بس ماشوفناش اي متعة في الرحلة !!
بقينا حافظين الطريق أكتر من اللي رسموه من كتر ما مشينا فيه ولفينا ورجعنا ١٠٠ مره ..
بس ملقيناش أي كنز !!
هل المشكلة فينا .. هل إحنا اللي مش عارفين نستمتع بالرحلة فعلاً ومش قادرين نشوف الكنز !!
ولا المشكلة في الطريق اللي ماشيين فيه وفي نظام الإستعباد اللي بيخلينا مش شايفين قدامنا من كتر الحجات اللي ورانا .. واللي حولنا من بنى ادمين إلى مجرد تروس في مكن مينفعش اننا نقف ولا نبطل نلف لحد ما نموت ويجي ترس تاني مكانا
ولا يمكن تكون المشكلة ان مفيش كنز أصلا وان دي مجرد خرافة ضحكوا علينا بيها واحنا صغيرين عشان نصبر على الساقية اللي هنتربط فيها لما نكبر !!
