من القلب للقلب ..  حسسونا اننا بشر

بقلم / أمل الوكيل

الفكره مش فى الارتباط … الفكره فى الاحتياج لكلمة “أنا جمبك…إرمى عليا…احكيلك”

احنا محتاجين حد يحسسنا اننا بشر …محتاجين حد منتكسفش منه ونحكيله كل تفاصيل حياتنا بكل العمق والدوشه والحزن والكأبه وحتى الهيافه اللى فينا ، محتاجين حد يسمعنا علشان عايز يسمعنا مش عشان احنا واجب او فرض عليه محتاجين نطلع الطفوله اللى جوانا ونتصرف براحتنا من غير ما يتقلنا  “هيافه”

عاوزين حد نقوله عن مشاكلنا من غير ما يقولنا “انت كئيب ونكدى”

عاوزين طبطه واحتواء مع عقل ينصحنا ويكمل احلامنا .

حد ما نخفش من الدنيا ومصايبها وهو معانا.

حد قابلنا بعيوبنا وكلامنا ومزاجنا اللى بيتغير فى الساعه الواحده مليون مره ..

حد ما اطلبش منه انه يسندى …لا هو بيسندى  قبل ما اقع ..

حد يعرف امتى يبقى صاحب وامتى يبقى حبيب..

وامتى يبقى اخ وامتى يبقى اب والعكس ..

حد يعوضنا شويه عن حالة اليأس والحزن اللى عشناها ويحسسنا اننا لينا قيمه وان غيابنا بيفرق معاه ومش مجرد حاجه على الرف ..

احنا عاوزين طبطه واهتمام وحب وثقه واحتواء مش ارتباط وضحك ع المشاعر والقلوب وخلاص

اختاروا صح علشان الندم فى الارتباط مابيبقاش مجرد كلمة يارتنى ..

دا بيبقى وجع وشروخ بتعشش جواك وكسر صعب إنه يتصلح مهما رممت فيه