من القلب للقلب .. دور الام خلص ولا ايه

بقلم / أمل الوكيل 

فجاة كده ف سن ال٢٠ لاولادى حسيت انى دورى خلص يادوب شايلة الهم بس من بعيد لبعيد ممنوع الاقتراب او التصوير

فاهمين كل حاجة عارفين بيعملوا ايه وان حبيت اعمل فزلوكة وادى نصيحة تبقى بايتة  او  بمعنى اصح قديمة لانى طيبة مش عارفة الناس دلوقتى بقت عاملة ازاى!!!!

انا يابنى ماما مش انت اللى ماما

واللى انت لسة هتعمله يااااد انا عملته وناهيته ع راى الاغنية بس لا مش حقيقة هما اللى ماما مع زمن جربوا فيه كل حاجة بسرعة مهولة في سنتين تلاته عملوا اللى عملناه ف ٢٠ سنة لا كده سلمت انك انت اللى ماما

ولا بقى الاوضة اللى دايما مقفولة مابيطلعوش منها إلا للأكل وممكن كمان يرفضوا براحتهم

ولما يأكلوا من بره واقولهم انا تعبت علشان تأكلوا حاجة نظيفة  يادوب يمدحوا في شوية السلطة بتوعى خدوا بالكم سلطة وبس انا يابنى بأكلك وانت فتفوتة صغيرة

انا ماما يابنى كان عندى امل انى لسة مطولة معاك

ولا بقى لو حاولت ابدى رايى في لبس انا دافعة حقه يانهار ابيض على الاعتراض والادب اللى نزل عليهم فجاة ليه تتعبى نفسك خلى حضرتك مرتاحة مش عاوزين نتعبك واحنا هنجيب كل حاجة ماشاء الله على تربيتى ادب واخلاق

اقولكم  حاجة اى ام دلوقتى ممكن تتبدل باى حاجة فيها بيض وبقسماط علشان اسرع منها وياريتنا عجزنا اصلا ده احنا يادوب هنفرح لما عرفوا يمشوا ع رجليهم

انا ماما يابنى

مين الاخت اللى ظهرت في حياتك فجأة وخدت وقت واهتمام اكتر من اللى اخدته معاك وانا بربى من٢٠ سنة ده ياماما طيب أصاحب انا الجيران ولا اعمل ايه انا دورى انتهى بدرى اوى

مابقاش قدامنا غير شيل المسؤلية من بعيد لبعيد ربنا يهديهم ويحفظهم في زمن بقى صعب مش عارفين أوله من اخره

ولا الزيارات العائلية اللى على رأيهم دلوقتى تضييع وقت فين يابنى امى زمان لما كانت بتجهزنا ليوم الجمعة علشان نزور مامتها وكنا بنبقى فرحانين كنا اطفال بجد

ولا بقى فين قوموا ده كلام كبار اللى كنا بنسمعها  كل ده موضة قديمة وانتهت زى دورى ماانتهى فجاة كأم مع الجيل الجديد

أنا ماما يابنى