أراء وقراءات

من القلب للقلب ..شريك حياتي

 

بقلم / أمل الوكيل

كتير بنقول ان أقصى طموحاتنا في الدنيا دي ان حد يطبطب علينا أو يحسسنا بقيمة وجودنا.. الحقيقة ان ده كدب وكلام فاضي..! احنا طموحاتنا أكبر من كده بكتير، طموحاتنا أكبر من الطبطبة ومن مجرد قيمة الوجود.

احنا محتاجين نتحب بنفس المقدار اللي بنحب بيه اللي قصادنا ويمكن أكتر كمان شوية، محتاجين نعيش حياة كاملة متكاملة، حياة صحية مفيهاش تعقيدات ولا خوف ولا حسابات تتعمل لحد.

محتاجين نعيش في النور مع الناس اللي بنحبهم،

محتاجين نسمع كلام حلو ونتشارك في خروجنا سوا ونخطط لبكرة مع بعض وناكل سوا ونشوف افلام وماتشات سوا ونزور اهلنا ونتمشى ومفيش مانع نتخانق مع بعض ونرجع نتصالح،

محتاجين حياة صحية..! اوعى تصدق اللي يقولك انا نفسي بس اشوفك مبسوط..!! لا مفيش الكلام ده، اسمها انا عايز اشوفك مبسوط “معايا”، ومعايا انا بس..! اه الحب فيه شيء من الأنانية المقبولة انا بس اللي يفرح معايا وانا بس اللي يخرج معايا، وانا بس اللي يحكيلي مشاكل شغله واسرار حياته، وانا بس اللي يتعب معايا، ده ساعات من كتر الحب بيبقى هاين عليك حتى الزعل تبقى انت برضه السبب فيه..!

محدش بيرضى بقليله في الحب، احب يعني اللي بحبه هو العالم واللي فيه، عايز اجري عليه احكيله كل تفصيلة في حياتي حلوة ووحشة ومقرفة وخايبة وهبلة وتافهة ومهمة وكل حاجة.. احب فلان يعني الدنيا تقف وتتهد عشان اللي بحبه مش موجود او تعبان او عنده مشكلة، معاه وعشانه هو بس كل قوانين الكون والطبيعة تتغير.

الحب يعني التواجد والمشاركة وتغيير قانون الاولويات، الحب يعني الحنية الزيادة والاحترام المتبادل والتودد والهدايا من غير مناسبات والمفاجآت الحلوة والغيرة الصحية والجنان الظريف وراحة البال وشيء كبير من السعادة وشوية مشاكل صغيرين عشان العين والحسد زي الملح والفلفل في الاكل؛ يفرقوا في الطعم بس الكتير منهم يسد النفس، بالنسبالي هو ده الحب غير كده كدب .

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.