من القلب للقلب .. عالم ولاد الاصول

بقلم / آمل الوكيل

ولاد الأصول مينفعش تتلخبط فيهم !

كل تفاصيلهم بتحكي عن رقيهم .. عن إحترامهم .. عن عزتهم .. عن جدعنتهم .. عن نزاهتهم .. عن شبعهم .. عن شياكتهم ..عن تحملهم للمسؤوليه .. عن إحترامهم للكلمه .. عن رزانتهم و عقلهم .. عن إتزانهم .. عن قوتهم ..

عن صبرهم .. عن عطاءهم ..عن صدقهم و وضوحهم إللي باين في عينيهم .. في نبرة صوتهم .. في كل خطواتهم ..

كتير عندهم أخلاق .. بس دول مهتمين بتفاصيل الأخلاق !

ناس بتجبرك تحترمهم و تعاملهم معامله خاصه ..

ناس بتجبرك تنتقي مواضيعك و حكاويك وكلماتك معاهم .. ناس بتجبرك تطلع أحلى ما فيك ..

ناس عندهم القدره يترفعوا عن إللي ملوش لازمه ..

عندهم القدره ينسحبوا بهدوء لو مع ناس مش مناسبه ..

الناس دي بتعرف تشتري نفسها صح ..

ناس متكلفه .. إشتغلت على نفسها أوي !

الناس دي معندهاش وقت ولا طاقه تضيعها على أمور مش هتضيف أو هتنتقص من سلامها النفسي ..

مش هتعرف تجاريهم لو مش نفس طريقهم .. هم قطعوا كتير من الطريق ده .. فمش هيقفوا في مكان يرجعهم وراء .. يا تكمل في نفس طريقهم يا تسيبهم وتمشي !

ولاد الأصول .. مش فكرة ناس جدعه و عندهم أصل بالوراثه !!

الناس دي بيتحضروا !

بيتحضروا من بدري لأهداف و لأدوار في الحياه و لمواقف وإبتلاءات متجهزه ليهم ..

أهداف صعب تتحقق من غير الصفات دي والأخلاق دي والتفكير ده والمشاعر دي والتركيبه كلها على بعضها !

ولاد الأصول .. لقب مش بالساهل .. وميتقالش على أي حد .. ده رحله و طريق و إختبارات ومجاهده و لغه تانيه غير أي لغه ..

لغة الصدق و المنطق و القوه و المرجله إللي بجد .. لغة الحزم والمرونه .. الهيبه والرحمه .. لغة البساطه و الفخامه .. السيطره واللين .. لغة تغافل و إرتقاء .. لغة الثقه بالنفس ..لغة أصحاب القرار ..

مينفعش تتعامل معاهم من غير اللغه دي .. مش هتفهمهم ولا هتدركهم ..

أمل الوكيل