من القلب للقلب..كلنا كواكب في حياة بعض ، في ناس كده في حياتك من أول ماتشوفها مابتحبهاش وناس تانية سبحان الله تجذبك غصب عنك، وده بالضبط اللى مرة قراته للروائى أحمد عبد المجيد، كان كاتب بوست بيقول فيه ما معناه : إن الناس زي الكواكب والنجوم والنيازك والكويكبات والقمر والشمس، كلهم بيلفوا ويدوروا حوالين بعض (في فلك يسبحون). ف تلاقي كويكب يقرب من كوكبك، ونجم يقرب من كوكبك، والقمر يقرب منك ويظهر وبعدين يبعد ويختفي وهكذا، والناس نفس الشيء.
من القلب للقلب..كلنا كواكب في حياة بعض
في ناس بتدخل حياتك ايام، بعدين تمشي وتبعد، يمكن ترجع تاني ويمكن تمشي للأبد، في ناس مش شبهنا بس مضطرين نتعامل معاهم، في ناس زي النيازك بتبقى خطر علينا، ولما بتقرب بيبقى تهديد كبير ع كوكبنا، تشقلب حياتنا وترعبنا، لكن بعد شوية ربنا بيخلصنا منهم او يخلصهم مننا.
كلنا من وقت للتاني يدخل حياتنا ناس، يظهروا فجأة من العدم ، بعد شوية برضو يختفوا فجأة، و في نوع من الناس يظهروا بس تحس ربنا مش رايد قربهم، تتفقوا تتقابلوا بس حاجة تحصل، تتفقوا على تفعيل علاقاتكم، بس حاجة تحصل تخرب الاتفاق ده ، ومهما حاولت تقرب في حاجة دايما تبعدك او تقف حاجز بينك وبينهم، متزعلش لما ده يحصل، دي بتبقى حكمة من ربنا.
افتكروا دايما ان محدش بياخد كل حاجة، فرصك في التقرب من الناس محدودة، مش كل ست / راجل هتعجب بيه هيبقى شريك حياتك. مش كل شغل نفسك تشتغله هتشتغله .. الحياة فالغالب بتجبرك تتعامل مع الحاجات اللي انت مبتحبهاش ولا بتطيقها، الزكاء فالموضوع ده هو انك تكون جاهز دايما للتعامل مع اي كيان ربنا وضعه في طريقك. عشان توصل لنهاية رحلتك بسلام.
اقرأ أيضا
