لعله خير
بقلم : أمل الوكيل
سنة ١٩٧٥م منتصف الليل، صحيت سكان جزر أنرينوف في آلاسكا / أمريكا ع صوت نباح الاف الكلاب المسعورة، كلاب بريه مفترسه، بتنبح بشكل هستيري مش طبيعي اطلاقاً .. ظهرت من العدم، مفيش اي سبب او مبرر لظهورها المفاجيء. قطعان مكونة من مئات وربما الالاف من الكلاب بتيجي من الاماكن البرية المحيطة.
كلاب بريه مفترسه و مرعبه و مزعجة كانت مشكلة كبيرة .. مكنش فيه قدامهم غير حل واحد انهم يخلوا المدينه من السكان و بعدين يشوفوا حل في الكلاب دي.. وفعلا الـ ٩٠ الف نسمة مشيو من بيوتهم بسبب الكلاب. متخيلين احساس الناس دي و قد ايه كان نفسها الارض تتشق و تبلع الكلاب المقرفه دي الي كركبت لهم حياتهم.
الجميل بقى.. بعد ساعات من خروج السكان، ضرب زلزال بلغت قوته 8.6 درجة جزر أنرينوف في آلاسكا جابها ع الأرض، مُش بس كده، ده كمان حصل تسونامي طولة 16 متر غرق كل جزء ف المدينة.. بعدها عرفوا ان الكلاب البريه دي كانت بتنبح بالشكل ده علشان تنبههم من الزلزال، لان اول كائنات بتحس بالزلازل هي الحيوانات، خاصة الضفادع والكلاب والقطط.
الكلاب دي ربنا حركها في توقيت معين علشان تنقذ ٩٠ الف واحد انهم يموتوا، جايز اتضرروا و كانو شايفين وجود الكلاب في مدينتهم كارثه .. بس في الحقيقه انها كارثة ظاهرها يبدو عذاب لكن باطنها فيه الرحمة.
في حياتنا كلنا عندنا كلاب طول الوقت بتنبح، كلاب بس ممكن تكون في صورة جوازة ممشيتش .. وظيفه مقدرتش انجح فيها .. خسارة فلوس .. حادثة عربيه .. مرض .. صديق خاين .. كلام بتقال عليك .. حجات بتنبهنا و بتمنع عننا شر و كلنا زي سكان الاسكا، متضايقين منها و شايفينها عوائق .. علشان كدة مفيش احسن من التسليم لارادة ربنا لحياتك طول الوقت .. ادعي بالسعادة و الراحة .. مع مين او فين متدخلش برضه وسيبها لربنا هو هيوديك للسعاده الحقيقيه بمعرفته هو قادر يسخر الكون كله علشان يسعدك و يريحك و يحميك من كل شر .. الكون كله جنود مجندة من صنع الله.
