من القلب للقلب .. لو حكينا يا حبيبي نتبدي منين الحكاية
بقلم / أمل الوكيل
صعب جدا أنك تختصر حكاوي عمرك و حياتك و تجاربك و صدماتك النفسية و رحلتك في الحياة في قعدة واحدة … أو اتنين … أو تلاتة … أو عشرة ….
في بداية تعارفك مع أي حد ، متفتحش كل ورقك ، و تكشف كل جروحك ، و تبرز كل مواطن ضعفك ، سيب الوقت يلعب دوره ، خلي المواقف تبين شخصيتك ، احكي كل تجربة و كل درس و كل موقف في وقتها المناسب ، خلي الكلام يجيب بعضه ، متدخلش على الشخص بكلاكيع الماضي قبل ما تعمل عنده رصيد ”
حاضر ” يكون رابط حقيقي بينكم ، اسمع ، و اتسمع ، و لو هتسأل اسأل الأسئلة المهمة ، اسأل عن الأساسيات ، اسأل عن الحاجات اللي أنت متأكد أنها لو ظهرت متأخر ، هتنهي العلاقة مهما كان رصيد الشخص عندك ، اسأل عن الحاجات اللي تجنبك حروب نفسية قدام ، اسأل عن أي حاجة أنت اتأكدت أنك رافضها و مش هتسمح بيها تاني ….. الحاجات اللي اتأكدت أنك عمرك ما تستغنى عنها …..
كل اللي مر عليك و اتعلمته في سنينك اللي فاتت ملوش أي قيمة لو افتقرت للذكاء الإجتماعي اللي بيظبطلك موازين العلاقات الإجتماعية من غير ما تتحول لإنسان فقير “الحدس” علاقاته فاشلة ، أو حتى إنسان إنطوائي منعزل قرر ينسحب من دروب الحياة …
السر كله في “التوازن” ….. التأني ….. و الحرية في الاختيار …. ليك … و ليهم …
