من القلب للقلب .. ماتزعلش علي نفسك ..!!
بقلم / أمل الوكيل
لو يوم حسيت إنك مش كفاية ” ماتزعلش ” .. شوف نفسك كويس بعينيك مش بعين حد هتلاقيك كفاية ويمكن كتير في عين اللي قادر يقدرك.
لو يوم سمعت كلمة عورت روحك “ماتزعلش” .. قول لنفسك إن اللي قالها مسيره يسمع كلمة تقتله لإن الدنيا دوارة.
لو في مرة سقف طموحك خانك و حد عزيز بيكسر خاطرك “ماتزعلش”..
جبر الخواطر علي الله مش شغلانة البشر.
لو حد بتحبه قالك إنه نفسه يخلص منك “ماتزعلش”.. و إدعي ربنا يخلصه منك يمكن يوم يعرف إنه خسر أو علي الأقل ماتكونش تقيل علي قلب حد.
ولو … ولو … ولو
حاجات كتير هتعدي عليك هتزعلك علي نفسك .. كلمة ولا موقف ولا حتي نظرة , ماتقفش عندها و ماتسيبهاش تعلم جوا روحك عشان إحنا نستاهل ندوس علي الحاجات دي ونمشي
.. إحنا نستاهل نسمع ونشوف اللي يرضينا ويطيب خاطرنا .. إحنا نستاهل ناس يحسسونا إنهم راضيين بينا ومعانا.
لو كل دا لسه أوانه ماجاش خليك مع روحك , طبطب عليها وطمنها , كلم ربنا هيبعتلك إشارات كتير إنه سامعك وإنك عزيز وعند ربنا لك قيمتك.
يمكن ماتلاقيش حد يقدرك ويمكن اللي بتحبهم يوجعوك بس دي مش نهاية دا إختبار عشان تعرف قيمتك وتقدر تسند روحك وتقويها علي اللي بيوجعوك.
إزعل علي أي حاجة .. لكن إياك تزعل علي نفسك .. كل وقت وله آذان ويمكن وقت جبرك لسه عليه شوية. ماتزعلش لأنه جاي جاي
ربنا والله سامع وشايف .. إرجع بقلبك لكرمه هو قادر ينصف روحك.
إزعل منهم بس ماتزعلش علي نفسك.
كاتبة صحفية
ة
