من القلب للقلب …مساحة من الحرية

كتبت أمل الوكيل

كتير سمعنا عن قلة الاهتمام، لكن عمرك فكرت ان الاهتمام الزيادة وحش؟! الإجابة المطلقة “أيوة” الاهتمام الزيادة وحش.. وكل حاجة زيادة وحشة حتى الحب والاهتمام.

شريك الحياة سواء زوج، زوجة، حبيب، حبيبة، حتى الأبناء الكل بيكون محتاج مساحة من الحرية. بس مساحة حرية وانت عينك عليه، مش سايبه يتفلق، ومساحة الحرية بتيجي بعد الاهتمام مرة واتنين وتلاتة، بعد كده مش بيكون اهتمام وسؤال بيكون اسمه “زن”.. والزن عموما بيولد الزهق والانفعال وردود سخيفة ممكن تتطور مع الوقت لمشاكل كبيرة..

يعني ايه مساحة حرية ومدتها قد ايه؟! مساحة الحرية يعني تديله فرصة يكون لوحده من غير ما يكون في الزام بالتعامل او التفاعل مع الطرف الاخر.. بمعنى انه أحيانا كتير بنكون محتاجين نقعد مع نفسنا من غير ما نكون مضطرين نشرح الأسباب على الأقل في نفس الوقت، بنكتفي اننا نقول “محتاج اكون لوحدي شوية”.. الطرف الاخر بيسأل مرة واتنين وتلاتة عن السبب وبعد كده لازم يوافق عشان المركب يمشي.. مش مطلوب منك تدي ظهرك وتمشي، لكن خليك ذكي شوية، ابعد شوية وانت عينك عليه.. تعامل مع الطرف ده في التوقيت ده زي تعاملك مع ابنك وهو بيلعب مع أصحابه وانت قايم بتبص عليه من بعيد.. قلبك بيكون مطمن طول ما انت شايفه كويس بس عينك مش بتروح من عليه.. المدة بتاعة مساحة الحرية بتختلف من شخص لشخص؛ ممكن تكون نص ساعة وممكن توصل لأسبوع او اكتر شوية صغيرين..

خلال فترة مساحة الحرية اللي انت سايبها للطرف الاخر، امشي بمبدأ يا بخت من زار وخفف.. يعني متقطعش تماما.. مفيش مانع من “صباح الخير” “مساء الخير” “عامل ايه النهاردة”.. دعوة صباحية ظريفة.. بوكيه ورد غير متوقع يتبعت على البيت او الشغل من غير وجودك وكإنك بتبعت رسالة “أنا هنا وقت ما تحب”..

حبيبك محتاج جدا انك تقدر وجوده وتحترم حالته النفسية.. ابعد شوية واديله مساحة يتنفس من غيرك، لو بيحبك هتلاقيه مستحملش ورجع جري، اوعى تلومه لان اللوم في اللحظة دي كسرة.. سيبه واحتضنه واحتويه وقوله قد ايه الفترة دي كانت وحشة عشان هو مكنش موجود فيها وقد ايه الدنيا بقت اجمل وهو موجود، اوعى تعاتبه يوم ما يرجعلك.. سيبه يحكيلك واسمع كويس، ولما تحب تعاتب، اختار الوقت الصح عشان يفضل يجيلك وميختارش حضن تاني يترمي فيه..

في ناس بتعيد تقييم العلاقة خلال فترة مساحة الحرية.. وفِي ناس مش بترجع تاني وبتحس انها مش قادرة تكمل.. عافر لو بتحب، بس نصيحتي الشخصية لو قالك مش قادر او مرجعش، امشي لان قرارات العقل بتكون غالبا صح..