من القلب للقلب .. مشاعر

بقلم / أمل الوكيل 

• ابعد عن الناس وحواراتهم

هتشوف راحة بال لأبعد الحدود.

• متمشيش تركز في اللي مش عاجبك

عشان عينك مش هتشوف اللي ممكن يعجبك.

‏- افتكر دايماً إن اللي بيشوف الناقص في أي حاجة متميزة عشان يقلل منها ويميز نفسه عن غيره .. عنده نقص من صغره و هيفضل حياته كلها يعوضه بالتقليل من الحاجات الحلوة. ومش هيتغير.

‏- اللي بيجادل في مواضيع هو غير قادر على استيعابها أو تحمل عواقب كلامه بخصوصها .. جاهل، قلة الكلام معاه راحة ليك.

• فكر نفسك كل يوم وأكد عليها إن مفيش حد باقي عليك و ان محدش هينفعك غير نفسك، إلا بقى لو عندك حد اثبتلك مرة بعد مرة إنه بيحبك اكتر من نفسُه او شايفك انت نفسُه.

• الصحوبيّة حلوة بس هما مش من الصحابة يعني، مش ابو بكر وعمر .. ف نحترم نفسنا و اسرارنا اللي تضرنا نحتفظ بيها لنفسنا وبس، عشان اغلب اللي حياتهم اتخربت كان بسبب اللي افتكروهم صحاب.

• أي علاقة، شغل، صحوبية، حب، اوحتى السوبر ماركت اللي بتشتري منه .. لما تلاقي نفسك بتسأل فيها (ليه؟ او تحس إن في حاجة غلط .. صدق احساسك ولو مؤقتاً و خد حذرك.

• لو فجأة حسيت نفسك مش مرتاح، مشاعرك اتلغبطت.. ابعد شويّة، خد هدنة متقلش عن شهر، هتعرف انت صح ولا غلط، ولا تعود، انت سد خانة بتتسد بأي حد ولا خانة موجودة لواحد محدد، هتعرف مين كان موجود علشان وجودك مهم في حياته، ومين كان موجود لمجرد أنك موجود قدامه، البُعد بيخلي الصورة أوضح.

• كل الناس بتعرف تقول كلام حلو .. كل الناس تقدر تتكلم معاك وتسأل عنك وتتابع تحركاتك وتطمن عليك .. كل الناس تقدر تكون محترمة أوووي معاك ومتغلطش ولو بكلمة ولا تتعدا حدودها، كل الناس ممكن تخلي اختها تكلمك ومامتها تكلمك والحج توفيق بتاع الكشري برضو يكلمك ويقولك الدنيا فله .. الكلام ببلاش واللي بيجاملوا كتير. ف متصدقش كلام عشان فالاخر هو كلام .وبس

• سوء الظن المتكرر قادر يوقع أي علاقة، احسن الظن قد ما تقدر .. طول ما انت قادر تدي وتسند حد بيحبك مشوفتش منه حاجة وحشة، كمل بنيّة الخير وربنا بيغير الاقدار لما تعمل اللي عليك بزيادة مادام مطمن ومبتتأذيش.