من القلب للقلب مودة ورحمة

بقلم / أمل الوكيل

– الطلاق بقى ليفيل في حياة البنات .. عندي صديقة باباها اشترالها شقة، قالها : عشان لما تتجوزي وتطلقي يبقى عندك مكان خاص بيكى ومحدش يتحكم فيكى لو انا مت.

وصديقة تانية كاتبة : شايفة نفسي بعد 5 سنين مطلقة محلوة بفكر ف نفسي وبس…!!

هُما مش فرحانين، ومهما أبدو من سعادة وراحة انهم أنفصلوا مش فرحانين، هما بس شايفين إن مبقاش في رجاله، وثقتهم في الجنس التاني اتهزت، ودي حاجة مهينة قوي لكل إنسان عايش في البلد دي.

– الموضوع مُش مضحك خالص، ولا هو حاجة هايفة .. دي مصيبة كبيرة أوي، إن البنات بقى جُزء من تفكيرهم إنهم كده كده هينفصلوا، ده بيخليهم مهيئين من الداخل للموضوع ده، وبيحفزوا نفسهم عشان يتجهزوله او ميتجوزوش من الاساس،

الناس اللي الطلاق عندهم سهل وإجرى ع بيت اهلك واتجوز ى غيره متنساش ان دور أختك جاي، و دور بنتك جاي.

زمان اهالينا مكنش يجرأ شخص يطلق، كان بيبقى ع نسايبه ميبقاش عندهم بنت مطلقة، كان بيبقى ع أسم عيلته

ميتقالش العيلة الفلانية بيطلقوا بنات الناس. و زمان كمان كان لما حاجة تبوظ يصلحوها، مرة واتنين وتلاته، كانوا بيبقوا ع صلة الرحم والنسب والعشرة.

الأنفصال مش أتنين بيسيبوا بعض، الانفصال روح شخص بتكسرها، هم تقيل بتشيله لعيله كانوا شايفينك ابنهم وراجلهم وهتشيل عنهم ومعاهم في حياة بنتهم .. الأنفصال مجتمع بحاله بيتعرض للهشاشة والفساد والطمع والنفوس المريضة

. لو داخل حياة اي بنت ومتخيل انك تطلقها ف يوم من الايام بلاش من الأول، بلاش تكسر قلب ست حبتك واتعلقت بيك، وام شافتك راجل لبنتها. صاحبوهم بالمعروف، ابنوا بيوت وحياة أصنعوا لبعض سكن وخلوا بينكم موده. الحياة مش ناقصة قرف والله.