كتبت:أمل الوكيل:
في مسلسل ليالي_أوجيني | مشهد إعتراف فريد ل كريمة بحبه رغم إنه متزوج. .. كتير مننا يرفض وبشدة ان راجل يحب ست غير مراته، او ان ست تعجب او تقع في حب شخص غير زوجها .. لكن نواجه المشكلة والاسباب لأ.
- عشان احنا معقدين وبنخاف من المجتمع والقيل والقال، إنما الحقيقة كتير أوي مننا خاض تجربه أن قلبه يروح لشخص تاني، خاض تجربه أنُه يحس أنه مش متجوز، وإن الشخص اللي معاه مش حاسس بيه ولا شايفة ولا عارف يحسسه إنه إنسان من أصله، كتير مننا محروم من مشاعر وحجات مجنونه نفسه يعيشها لكن ميقدرش يطلبها او يصرح بيها لانه هياخد فوق دماغه ومش بعيد يتقاله : عرفت الحجات دي منين ؟؟
-
مهما حاولنا ننكر ونستنكر العلاقة مش هنقدر ننكر ونداري إن كلنا دايس علي نفسه وعايش حياه مش حياته .. كلنا بيسعد كل الي حواليه علي حساب سعادته … بيكمل صوره الحياه المثالية الي في خيال أهله ..مراته و مجتمعه. مكمل عشان العيال، عشان ميتقالش انفصل عشان كذا .وانتم فاهمين بقى.
عايشين حياه كلها مكاسب للجميع الا روحنا … ساكتين عن كل الي مش عايزينه …
حابسين مشاعرنا .. حابسين طموحاتنا عشان الكل يكون سعيد .. مشاعرنا المكبوتة و رغبات كتير مننا اتسببت في خلل ف هرموناتنا، اتشوهنا، وبقينا ننام ع هيئة حرف دال في سريرنا مع نفسنا وبس.
-
مشهد ليالي أوجيني خلى الناس في السؤال الي مالوش اجابه .. وبعدين هنعمل ايه ؟هنفضل كده حزانا مكتئبين و محبطين وإلى الاسوء ولا أيه ؟! .. نفضّل طول عمرنا بنمثل؟ و لحد امتي حنفضّل بنمثل؟ ولا نتصرف ونسعد نفسنا ؟!! ولو كملنا وخلاص .. لحد امتي حنفضل حابسين مشاعرنا و احلامنا؟ لحد أمتى هنتحمل.
-
مشهد ليالي اوجيني ملخصة : اكمل زي ما انا عشان ارضي الاهل، المجتمع، ومخسرش العيال، وميتقالش انفصل او انفصلت .. وأموت وانا اصلا معشتش ولا عرفت معنى العيشة، ولا انفجر واثور واعمل اللي انا عاوزة وانا ونصيبي. ؟!! والاجابة .؟؟ كل الطرق بنفس النهاية
