بقلم/خالد طلب عجلان
في السابعة صباحاً استيقظت الأستاذة بهية..
وعلى غير العادة فهي تستيقظ كل يوم بعد الثانية عشر ظهراً…
ولكن ما الذي أيقظها في هذا الصباح المبكر فلا شئ يشغلها …هي تعيش وحيدة بعد وفاة زوجها موظف الري..وزواج بناتها الأربع وهي ليست بعجوز هي تخطت سن ال 60 بسبع سنوات فقط وعلى ما أعتقد عند بعض النساء أنها ترى نفسها مازالت صغيرة..
وسألت عن سر الإستيقاظ المبكر من حامد عبدالودود زوج إبنتها الكبرى…
قال لي إتصلت بى في الصباح الباكر وقالت لي تعالى بأسرع مما تتخيل ..لو هتاخد تاكسي ويكلفني ٣ جنيه تعالى ..ومعروف عن الأستاذة بهية شدة بخلها..
وصعد الأستاذ حامد لمقابلة ..بهية هانم…
الأستاذ حامد …صباح الخير يا حماتي..
بهية هانم …صباح الخير ياواد يا حامد
قالت بهية هانم …في موضوع مهم عايزه أكلمك فيه
الأستاذ حامد.. خير يا حماتي
قالت له كان معايا مبلغ كده شيلاه لوقت عوزه…
وجه وقت العوزه
الأستاذ حامد ..ايه هتحجي..
بهية هانم أحج إيه …وهي الكعبة هطير…
قالت بهية هانم.. كنت عايزه…دكتور تجميل يشوف شغله معايا
الأستاذ حامد هتشتغلي مع دكتور تقصدي ..
بهية هانم لا ..انا عايزه دكتور يلمع ويصنفر ويشد ويمد ويكسر ويفك ويعك …
الأستاذ حامد..دكتور تجميل..
بهية… خليه مركز تجميل
الأستاذ حامد إنتي عايزه معمل ..مش مركز
بهية هانم بطل تريقة يا حامد هتشوف ولا أشوف غيرك ..
الأستاذ حامد لا يصدق عقلة… حماتة عدت الستين ب٧ سنين وعايزه تعمل تجميل يا سنة هباب وايام شبه الطين…
وايه السبب ياحماتي قالت ..جايلي عريس
الأستاذ حامد جالك في المنام ..
الأستاذة بهية لا في الإنستجرام. …
الإستاذ حامد والعريس عنده كام سنة ثمانين …
بهية هانم لا ثلاثين …
الأستاذ حامد ووافق إزاي عملتيلوا عمل على ظهر جمل
قالت له لا أحنا هنتجوز على حب ..
الأستاذ حامد… ولا تخليص حق .
الأستاذ حامد..يا حماتي وفري القرشين للأيام اللي باقية في حياتك أو تصدقي بجزء يتذكرك الناس بعد مماتك أو اطعمي جائع أو ساعدي مسكين ..
قالت له…حامد يومك مش فايت أن أخدت قرارى..
الأستاذ حامد..طب والواد العريس ده هتدفعيلوا كام علشان الجوازه…قالتلوا وكتك جنازه …
وهدفع ليه… هو اللي هيدفع هيجب شقة ومهر وحله وقله وزير وطاولة وزهر..
وغرفة نوم وشقة في العجمي …استاذ حامد ضرب كف على كف…وعجبي
شاف صورتك ياحماتي ع النت قالت له لا
انا حاطه صور كريستين ستيوارت..
وعايز المعمل قصدي المركز يطلعني زيها لا ازيد ولا اقل عنها…
ياحماتي الأفضل تطلعي عمرة..افضل من العمره
حكمت راسها وقررت ودمخها ناشفة ونفذت …
صرفت القرشين وخرجت من المعمل على عكازين ودلوقتي عايشه في غيبوبة …
هوس التجميل دمرها وجننها …ومن وقت للتاني صابتها نوبة…