مهما كان مجموعك صغير إفرح

20 أغسطس، 2021

بقلم أ.د. نادية حجازي نعمان

مهما كان مجموعك صغير إفرح

طلعت نتايج الثانوية العامة… فيه اللي جاب المجموع اللي كان بيحلم بيه، ومهما كان مجموعك صغير إفرح

وفيه اللي حارب و عمل كل اللي عليه و لقى نفسه جايب خمسين أو ستين في المائة.

مهما كان مجموعك صغير إفرح

نفسي أوضح لكم أحفادي طلاب الثانوية العامة : الثانوية العامة لا هي نهاية الكون ولا نهاية الدنيا …أحبائي دي البداية ياشباب…إوعى تفتكر ان اللى رمى نفسه وانتحر قد حل المشكلة…هو جاب لنفسه أكبر مشكلة لأن أنتم ياشباب عارفين عقوبة المنتحر .

خلينا نتكلم ببساطة : هل اللي جاب مجموع أد مجموعك مرتين لازم يكون ذاكر اكتر منك ؟؟ خلوني أجاوب بصفتي أستاذة جامعية …الإجابة لا …لأن فيه إحتمال آخر و هو إنه غشاش ….ده إحتمال وارد فيه كتير متفوقين بمجهودهم ، لكن هذا الإحتمال الذي أطرحه عليك الآن إحتمال وارد.

انت حتبدأ تشكل مستقبلك حاول انك تعمل اللي عليك وحاول تثبت وتقف متزن.

الستين فى المائة دي مش معناها ياللا اكتئاب نفسي… أبدًا …دي ممكن تكون بداية مستقبل باهر ومليء بالأحداث السعيدة.

قيم نفسك صح

ما تديش لنفسك أصفار في تقييمك لذاتك ومن فضلك أرفع راسك فوق انت حاصل على الثانوية العامة …أنت بقى لك ١٢ سنة بتتعلم…أنت مكافح …أنت بخير وعليك البدء في عقد النية إن مستقبلك كله سيكون سعي بشرف وبأخلاق وبخطوات كلها ترضي الله…عدد نواياك للفترة القادمة فتعدد النيات تجارة العلماء.

خلي بالك أنت ممكن تكون أقوى من ناس جابوا ٩٠٪؜ وخلي بالك كمان إنك أحسن من كل اللي جابوا مجاميع عالية بالغش ( و حياخدوا فرصة مش بتاعتهم) ونسوا تمامًا قول نبينا عليه الصلاة والسلام ” من غشنا فليس منا” .

سعيك وتعبك عملته…و مجموعك ده بتاع ربنا …عليكم السعي وليس عليكم أحفادي بلوغ النجاح .

خلاص…أنتم سعيتم و دي عطية ربنا لكل واحد منكم …انهض و احمد ربنا على ما أعطاك.

الثانوية العامة هي مجرد محاولة لشق الطريق ناحية مستقبلك وليست نهاية حياتك وزي ماقلت لك : أرفع راسك فوق إنت ناجح وأرجوك أفرح بنجاحك واتهنا حتلاقي الدنيا بقت جنة.

٢٠٢١/٨/٢٠

التعليم : نسبة النجاح في الثانوية العامة 76% علمي و70% أدبي

وضوح تنشر صور وأسماء ودرجات أوائل الثانوية العامة 2021