ميمي الشربيني “أيقونة المعلقين العرب”
متابعة/ هاني حسبو.
لو سألت اي حد من محبي كورة التمانينات و التسعينات و انت طالع و قولتله واحشك صوت مين؟…اغلب اللي هيردوا علي السؤال هيذكروا اسم “ميمي الشربيني”.
-عظمة الشربيني كانت في صوته اللي يحسسك بالسعادة و انت بتتفرج…عظمته كانت في شدة احترافيته في التعليق و اللي ميعرفوش عمره مايتوقع انه لعيب اهلاوي كبير…عظمة الشربيني في حب كل جماهير مصر علي مختلف انتمائاتهم و تفاؤلهم بيه و رغبتهم الدايمة انه يذيع كل متش…عظمة الشربيني انه كان حلقة وصل بين مدرسة التعليق القديمة بتلقائيتها و مدرسة المعلومات الجديدة في زمن كان الحصول فيه علي المعلومات مش بسهولة وقتنا الحالي.
-الشربيني قال لنا ان الكورة ممن تتشاط من زاوية مقفولة بالشمع الاحمر عن طريق لعيب يمتلك اكسترا مهارات اكسترا حواس و لكن ممكن متدخلش عشان العارضة بتتزحزح سنتيمترات او ان الجول يكون بيرتدي قفاز الإجادة.
الشربيني هو اللي عرفنا ان في صحيفة اجنبية كتبت تقرير عن حسام حسن قالت فيه انه EVER GREEN.
-الشربيني وصف متعب بأنه احد جنرالات منطقة الجزاء و متبرمج ع الأهداف.
-الشربيني تغزل في رأسية عظيمة لاسماعيل يوسف في مرمي شكري الواعر التونسي “نطة ايه و هيدز ايه و حلاوة ايه…و بعد ما فحص كل زوايا شكري الواعر حطهاله في التسعين اليمين مع تحيات اسماعيل يوسف يا شكري.
-الشربيني هو من اكتشف وجود عنقود مهارات حوالين رجل حازم امام و بركات و هو اللي كشف انهم بيعملوا كل حاجة في الكورة …ده ناقص يكلموها!…و هو اللي نعت احمد الكأس ب “لؤلؤة مصر السمراء”
-الشربيني هو اللي شاف رأسية زيدان في البرازيل “مقطوفة بالسكر يا زين الدين”…و اثني علي الركبة و نص في سندة كلويفرت في الهدف الأول في الارجنتين ٩٨.
الشربيني نقل لنا ان الفاولات البعيدة اصبحت زي البنالتي و منها اعاد طاهر ابو زيد اكتشاف نفسه في مشهد دراماتيكي غريب في نهائي كاس مصر التاريخي ٩٢ و في نفس المتش احتار في تفاوت مستوي رضا عبد العال” مش قادر اقيمك يا رضا…حبة فوق و حبة تحت” و أكد ان رضا “قماشة تانية”.
-الشربيني طلب صراحةً استنساخ حسام حسن لأنه “ظاهرة كروية”…و صرخ من ذكاء عبد الحليم علي “ياااااه ع العظمة ياااااه ع الفكر”.
-الشربيني انهي رحلته العظيمة في التعليق بأحد اعظم مشاهد الكورة المصرية في متش الجزائر ٢٠٠٩ بمقولته ” اتعملت حلو ….و عماد حلو…و احنا حلوين”.
..قال في مباراة الأهلي و الزمالك إللي انسحب فيها
الزمالك 1996 .. الأهلي يلقن الزمالك درسا قاسيا في محو أمية الكرة الحديثة قال كمان..لما سألوا بيليه ليه مجاش بيليه تاني قال لأن والدي ووالدتي بطلوا إنجاب .الشربيني أيقونة المعلقين العرب.
