بقلم / هناء هنتش
لما كنت فى روسيا كانت اكتر جملة بسمعها
Menia nado otshetsa
Nado ezyotshat !!!
يعنى أحتاج أن أدرس هذا
أحتاج أن أتعلم …
لما تيجى تكلم اى حد فى اى موضوع يقولك محتاج ادرسه … محتاج اتعلمه !!!
طبعا بالنسبة لواحده جايه من بلد كلها ماشية بالفقاقة والفهلوة واحنا طبعا ام الفهلوة وام المفهومية وعلمنا فى الراس مش فى الكراس نلاقى الكلام ده غريب..
ايه الناس الاغبية دى ؟ ده انا بتكلم فى مواضيع مفهومه
مواضيع معروفه
اى عيل صغير عندنا يتكلم فيها …
ولما ييجوا يدخلوا في اى موضوع او يعملوا اى شغل تلاقى دراسة جدوى بجد مش اى حاجة مضروبة عشان ناخد موافقة على القرض !!!
زوجى السابق رحمة الله عليه كان ياخذ دورات فى أى مادة علمية متعلقة بعمله ولما قلتله على موضوع حرمة فوائد البنوك وخطورتها راح اخد دوره فى فقه المعاملات المالية في الاسلام !!! عشان يفهم ايه موضوع الربا والبنوك ده …
لكن طبعا بالنسبة لى أنا كنت بحس أنه مجتمع غبى بجد وان الأمور ابسط من كده عشان كده كنت بدأت أدى دروس فى اللغة العربية دون أى دراسة لما عرفت كام جملة روسى وكنت بدى الحصة بفلوس بهدف الربح بس طبعا فشلت ومفيش حد من اللى جم ياخدوا عندى اقتنع بيه رغم الدعاية اللى عملناها
تعلم اللغة العربية من منبعها
معلمة عربية لإتقان اللغة العربية … وهكذا … ….
بس لأنى طبعا لا درست أدى دورات ازاى ولا كان عندى حتى منهج ادرسه
ولا حصيلة لغوية كافية لتوصيل المعلومة …
كل ده ورحت أدى دروس لغة عربية لمحبى تعلم اللغة العربية !!! معتمدة فقط على قناعتى أنى اقدر أدرس وانى هعمل الحصة ب ١٠ دولار بس يعنى اوكازيون ….
يعنى كتر خيرى …
مش بقولكم شعب ام الفقاقة وام الفهلوة …
مش بس كده بعدها تجرأت أنى أدى دروس للجالية الإسلامية هناك فقه على عقيدة على تفسير قرآن كله كده شروه واحده ما احنا بتوع كله …
وأقرأ وافسر الايات ما هى واضحة طبعا هى محتاجة يعنى فقاقة اجمع الناس وأعلمهم الدين وانا طبعا مكنتش اعرف حتى عدد ركعات السنن الرواتب
ويسالونى ولما اتزنق اقول اى إجابة بالاجتهاد وبالقلب الابيض التقى كده كله بيمشى وقلب المؤمن دليله واستفتى قلبك ولو افتوك واقرأ لهم قرآن وانا مش عارفه ابسط احكام وقواعد القراءة !!!
لحد لما كل شوية تظهر لى واحده دارسة شوية تحرجنى وتطلعنى غلطانة ادام شوية الضحايا اللى كنت بمارس فيهم هواية الجهل بتاعنى حتى القراءة بئت تطلعلى فيها غلطات فى الأحكام والمخارج ده انا ام اللغة العربية
انت هطلعيلى غلطات ؟؟!!
المهم قلت انسحب قبل ما اتفضح أكثر من كده …
وبعد فترة صراع عرفت اخيرا مين الجاهل فينا …
وفهمت أخيرا انى لازم أقول زيهم ..
لازم أدرس … لازم أتعلم …