نصك التاني..

كتبت / عزه السيد

أوقات بنسمع حد بيقول سيبونى أقعد لوحدى .. بحب أنعزل مع نفسي فى هدوء لفترة.. أو مش قادر أتكلم مع حد ..وبتلاقى هدوئه وسلامه النفسي مع نفسه.
الناس اللى متعرفش تتكلم مع أى حد في اللى بتحس بيه..الناس اللى بتبقى دايما محتاجة كل فترة وقت تنعزل فيه عن العالم اللى حواليها وتفصل من دوشة الحياة وتلاقى اتزانها وهدوئها النفسي فى انعزلها بنفسها..

الناس دي هى نفس الناس اللى لما بتقعد مع نصها التانى أو تؤأم روحها زى مابيقولوا..بتفضل تتكلم وتتكلم و تعبر عن اللى جواها بكل سلاسة و سهولة بدون قيود أو تفكير.. احساسهم بس هو اللى شغال و عقلهم بيبقى واخد أجازة من كتر الضغط و التفكير…
الناس دي مع نصهم التانى بينوروا وبيشِعوا جاذبية.. عيونهم بتلمع من السعادة و الراحة النفسية و أرواحهم بتبقى مليانة طمأنينة و هدوء نفسي..
أما لما بتحط الناس ديه مع الأشخاص الغلط و المُختلفة عن طبيعتهم تماما بتلاقيهم بينطفوا و يتقوقعوا و يكتموا اللى جواهم وميتكلموش..صمت دائم..

نصك التانى و توأم روحك هو الشخص اللى بتحس معاه بثقة و أمان ملهومش حدود.. علاقتكم ساندة على رصيد كبير من الإيجابية ومافيهاش أى سلبيات تقيدك.. بتحس معاه ببرأتك وشفافية كاملة فى علاقتك بيه..
“نصك التانى اللى بتكون معاه دايما فى أحسن صورة ليك بره و جوة”
علاقتك بيه علاقة نادرة من نوعها و مُتعة الوجود حواليه مالهاش مثيل..بيغذى جواك احتياجاتك للتواصل و المشاركة و الحب و الأمان و بتحس بجمالك معاه لانه بيطلع كل حاجة حلوة جواك..

عارفين ليه كل المعانى الحلوة دى فى علاقتك بيه؟!؟
عشان الشخص دة بيسمعك.. بيسمعك لساعات طويلة بدون ملل أو يقطع كلامك أياً كانت الاسباب ومهما كانت أهميتها بالنسباله .. لانك بكل بساطة على رأس أولوياته ..لما بيسمعك كمان عُمره مابيحكم عليك ولا بيزهق من كلامك مهما كان .. و عُمر ما فى خناقة ممكن يأنبك و يلومك فيها.. ولا عُمره بيحسسك انه حطك فى قالب مُعين بسبب انه عارفك عن قُرب أو حتى لسنين طويلة..
بيسيبك براحتك تعبر عن اللى جواك وبيشاركك هو كمان باللى جواه.. علاقتكم ببعض كلها استمتاع وتسامح و دعم و سند .. أول ما بتقع فى مشكلة أو بيكون فى حاجة مضايقاك أو قلقاك بتجرى عليه بدون تردد لانك عارف انه جنبك من غير أحكام ولا تأنيب .. هو مُتقبلك زى ما انت وبيحبك زى ما انت..

أما الشخص الغلط .. إما بيكون شخص ممكن تستغنى عنه بسهولة من غير ما تتلفت وراك لانه بيسحب طاقتك الايجابية و بيملى حياتك طاقة سلبية.. أو بتبقى مضطر تتعايش معاه غصب عنك.. زى الأهل ساعات أو الزوج أو الأبناء..

الحياة مع الشخص الغلط عاملة زى اللى ماشى فى حقل ألغام .. بيتحسس خطواته بحرص و خايف من أى انفجار مفاجئ..
غالبا انت حسيت انه زى حقل ألغام عشان جربت قبل كدة كتير تتواصل معاه وكل مرة تتوجع أوى.. تتوجع من عدم الاهتمام والتقدير .. عدم التفهم و الاستيعاب..دة غير الأحكام اللى بيُصدرها عليك طول الوقت و تريقة و تسفيه بكلامك .. أو الأصعب من دة كله إنه يعكس كل الوحش اللى فيك و عُمرك ما بتشوف فى عنيه تقدير للحلو اللى جواك..
فرغم انك كنت بتتمنى تقدر تتواصل معاه و تبقى قريب منه ..لكن للأسف عَقلك بقى خلاص معلم عليه و بقى وجودك معاه وجود صامت بروح ميتة كرد فعل لا واعى مش بتتقدر تتحكم فيه أو تغيره..

خلى بالكم إنتو نفسكم ممكن تكونوا أشخاص صح أو غلط فى حياة غيركم .. غالباً هى عجلة بتدور.. بس الحقيقة المهمة إنك تحاول ماتفقدتش نفسك مع الشخص الغلط وما تفضلش تلوم نفسك طول الوقت إنك بعيد عنه نفسياً..
“أصل صمتك وتقوقعك النفسي دة رد فعل لا إرادى لأذاه النفسي ليك..”

عشان كدة الشخص اللى يعرف عيبك و يفضل جنبك .. ويحميك وقت ضعفك .. ويسندك لما عيبك يأثر عليك .. ويغطى عيوبك بكل قوته ويخبيها من الناس حتى من نفسه.. ومايضغطش عليك فى نقطة ضعفك وياخد باله أوى انه مايجرحكش وإنك عُمرك مابتحس باحراج تجاه.. هو دة نُصك التانى .. توأم روحك.. الشخص القريب لقلبك وبيحبك بجد .. اللى بيحس بيك وعارف إن الحُب معناه إنكم بتكملو بعض .. ضعفك يقابله قوته..و إنك معاه بتشوف نفسك دايما أجمل..
بتحسوا مع بعض بعلاقة شبه السحر ..لو حسبتها عُمرك ما حتفهم هى ازاى حصلتلك ولا من أى ناحية اتوجدت فيها..بس اللى أنا متأكدة منه إنها علاقات من مستوى تانى خالص .. علاقات نادرة ..علاقات بتلمس قلبك ..بتحس فيها انك تقدر تكون زى ما انت من غير تكلف ولا تمثيل .. بتعيش فيها سِنك اللى قررت تفضل مُحتفظ بيه فى قلبك مهما اتقدم بيك العُمر..